Radaelli, Anna. Raimon Gaucelm de Béziers. Poesie. Firenze: La Nuova Italia, 1997.

Code: 401,007 Auteur: Raimon Gaucelm de Bezers Genre: Planh Numero: V

Quascus planh lo sieu dampnatge

I	1	Quascus planh lo sieu dampnatge
		e sa greu dolor,
		per qu’ieu planc e mon coratge
		lo mieu bo senhor
	5	quez es mortz. Dieus la maudia
		Mortz! Qu’aissi·ns    rauba tot dia,
		que·lhs   melhors ne va menan
		e sels que meinhs fan folia,
		don i prendem totz gran dan.
II	10	Ja no veirai son estatge
		que ieu tost no·m   plor,
		on menava·l   gran barnatge
		soven a ss’onor.
		Sertas, gran dolor deuria
	15	aver qui n’avia paria,
		ni a cui vai remembran
		los bos faitz quez el fazia.
		Sanhs Miquels, siatz·l   al denan!
III		Sus en l’onrat heretatge
	20	on so li sanhtor,
		― a Dieu m<e> don<e> salvatge! ―
		el gra pus aussor
		a quis la Verges Maria,
		don li prec per cortezia
	25	qu’al nobl’en Guiraut prezan
		de Linha, per companhia,
		done·l   baro San Johan.
IV		Tota gen d’aquest regnatge
		per sa gran valor,
	30	honron selhs de son linhatge
		e lur fan amor.
		Quar elh dava e metia,
		que tot quant aver podia
		elh metia en boban,
	35	que·l   mon home non avia
		que·l   sembles de donar tan.
V		Anc, borzes ni de paratge,
		lunh home melhor
		no vim. Per que·n van arratge
	40	et a gran tristor
		siei amic, et ab feunia.
		E Jhezus Cristz, que·l volia,
		pres l’a·l melhor jorn de l’an,
		per que crei sert quez elh sia
	45	lai on tug li cors sans van.
VI		Totz preguem Sancta Maria,
		qu’a sobre totz poder gran,
		quez elha amigua·l   sia
		e que·l   met’ab Sanh Fulcran.