Radaelli, Anna. Raimon Gaucelm de Béziers. Poesie. Firenze: La Nuova Italia, 1997.

Code: 401,001 Auteur: Raimon Gaucelm de Bezers Genre: Chanson de croisade Numero: VII

Ab grans trebalhs et ab grans marrimens

I	1	Ab grans trebalhs et ab grans marrimens
		veirem hueimais Cristïantat estar,
		pus mortz es selh qu’era del mon ses par,
		qui valia sobre totz los valens,
	5	qu’era de cor, per Jhezu Crist, issitz
		del sieu païs contr’als fals Turcx aunitz.
		E Dieus a·l pres e trach d’aquesta vida,
		pero non l’er trop esta mortz grazida.
II		Mortz es lo reis, don em trastotz perdens,
	10	tan que lunhs hom no pot ben adismar.
		E ges per so sa mortz no·ns deu mermar,
		ans devem mielhs pus afortidamens
		totz anar lai, ab armas gent garnitz,
		per secorre a selhs qu’elh a gequitz
	15	e per amor que·l dans e la fallida
		restauressem en alquna partida.
III		Ar fora temps qu’om se crozes breumens,
		e clercia o degra prezicar
		per tot lo mon, e tal perdon donar
	20	qu’om se·n crozes pus afortidamens,
		et enaissi los Francx foran seguitz
		et aiudatz e trop pus afortitz.
		Mar la Gleiza esta tan endurmida
		que de passar negus homs no·n covida.
IV	25	Ans vos dirai que fan cominalmens
		selhs que la crotz solïan far levar:
		elhs, per deniers, la fan a moutz laissar,
		e degron mielhs prezicar a las gens!
		Quar moutz n’esran sai flacx et adurmitz?
	30	Quar del crozar nulhs prezicx no·i ’s auzitz!
		E del prezic degra·s movre tals crida
		per que·s crozes la gens pus afortida.
V		Si per lo mon fos bos acordamens
		que Cristïas se denhesson amar
	35	e·s volguesson contr’als Turcx acordar,
		non lur foro ja pueis trop defendens,
		ans cre fosso totz mortz o escofitz,
		e la terra, on ilh se so noiritz,
		per Cristïas fora leu conquerida
	40	que ja lunh Turc non trobera guandida.
VI		Maires de Dieu, Verges emperairitz,
		pus pres avetz aquelh que·ns era guitz,
		al rei Felips donatz longamens vida
		e gardatz lo de dan e de falhida.