Bertoni, Giulio. I trovatori d'Italia. Modena: Editore Cav. Umberto Orlandini, 1915.

Code: 229,001a=150,001 Auteur: Guillem Raimon , Ferrari de Ferrara Genre: Échange de coblas Numero: LXX

Amics Ferrairi

		[Raimon Guillem]
I	1	Amics Ferrairi,
		Del Marqes d'Est van
		Man
		Dizen q'a cen fi,
	5	E poders l'espan
		Tan
		Q'algu sei vezi
		De ios li n'estan,
		Gran
	10	E pauc, ab cap cli,
		Si q'algu hi an
		Dan;
		Don soi yeu vengutz
		Nutz
	15	D'aiso q'eu no say
		Say;
		Mas s'en el vertutz
		Lutz
		De pretz, trobar l'ay;
	20	E de pueis tengutz
		Mutz
		Per re non seray
		May
		Ez en locs degutz
	25	Cutz
		Nos'e criz partray.
		Qals q'esteya,
		Res no creya
		Q'ieu no·l met'el cor.
	30	Mor
		Qi desleya
		Qant el veya
		Qe non an de for
		L'or,
	35	Qar altreya
		Prez on deya
		Far plus ric trezor
		D'or;
		Q'om s'apley'a
	40	Prez q'om pleya,
		Sol vil vol a cor
		For.
		[Maistre Ferairi]
II		Amics en Raimon
		Guillem, pueis entrest
	45	Mest
		Nos, d'un pes preon
		Tantost m'aleugest;
		Rest
		Doncs e pui a mon
	50	Mos sens sus el test.
		[Dest]
		Me·n dreig e·us respon
		Qe pro a conqest
		D'Est
	55	Lo Marqes amics
		Rics
		E sos grans poders
		Ders
		Ten sos enemics
	60	Trics
		Bas e sos sabers
		Es dels plus antics
		Brics
		C'onors e·l valers
	65	Vers
		D'el es nostr'abrics.
		Pics
		No·il tol sos avers;
		Qar gent dona
	70	Qan sayzona,
		Co·s tain a baro
		Pro,
		Qi s'adona
		Vas gen bona:
	75	E car vos sai bo
		No
		Tayn q'espona
		Ni·l somona
		Qe·us onre ni·us do
	80	Pro;
		Mas felona
		Gen bricona
		Ab lui no fay so
		Pro.