Aston, S. C.. Peirol. Troubadour of Auvergne. Cambridge: University Press, 1953

Code: 366,013 Auteur: Peirol Genre: Canso Numero: X

D’un bon vers vau pensan com lo fezes

I	1	D’un bon vers vau pensan com lo fezes,
		qu’amors m’adutz l’ochaizon e·l talan
		e·m fai estar del tot el sieu coman
		si que mon cor n’a retengut en gatge.
	5	Trop demostra vas mi son poderatge,
		qu’era m’auci lo trebals on m’a mes
		per tal domna qu’endrech de mi no·s tanh.
II		Aquesta·m platz mais que neguna res,
		a lieys m’autrei litges deserenan.
	10	Si tot no·m vol, mi qu’en cal? qu’ atrestan
		serai aclis vas lo sieu senhoratge
		cum s’ieu l’agues fait certan homenatge.
		E fora be grans tortz qui m’en tolgues
		lo desirier, pus tot l’als m’en sofranh.
III	15	Be vuelh s’amor, mas querre no·l aus ges;
		pero ab motz cubertz l’en vau parlan,
		e s’ilh volgues esguardar mon semblan
		ja no·l calgra pus vertadier messatge,
		qu’ ab sol l’esgart pot hom ben per usatge
	20	lo pensamen conoisser, tal vetz es;
		e membres li qu’assatz quier qui·s complanh.
IV		Be sai qu’ieu l’am s’ilh amar me volgues,
		mas non o vol, ans mi ten en soan.
		Cujatz vos doncs, quan si vai apessan
	25	de sa valor ni de son ric linhatge,
		que no sia ben fer’ e ben salvatge?
		Pero valer sol en amar merces;
		e ve·us l’esper on ma dolor refranh.
		E donc valra mi ja ma bona fes;
	30	qu’ieu non am ges per esqem cum cill fan
		que son feignen galiador truan
		fals, lausengier et ab voler volatge.
		Ans ai en lieys assis tot mon coratge
		horas e jorns e setmanas e mes,
	35	qu’en un desir sui ades e remanh.
VI		Aquest conortz non es mas nescies,
		qu’en ric’ amor, pus trop va trahinan,
		non deu hom pueis aver fiansa gran.
		Que farai donc? Partir m’ai d’est follatge?
	40	Ieu non! per que? Quar far vuelh mon dampnatge,
		aissi cum selh qu’al joguar s’es empres,
		que pert e pert per respieg de guazanh.
VII		Dona, el vers entendetz mon coratge,
		e·l vostre cors francs, naturals, cortes,
	45	sabra chauzir so qu’a vos s’en atanh.
VIII		Soven a hom en trop sen gran dampnatge,
		e per foudat ven mantas vetz grans bes.
		Donc en aquest’ aventura remanh.