Javascript DHTML Drop Down Menu Powered by dhtml-menu-builder.comJavascript DHTML Drop Down Menu Powered by dhtml-menu-builder.comJavascript DHTML Drop Down Menu Powered by dhtml-menu-builder.com

* Introduction
* Notice Bibliographique
* Vocabulaire
* Observations

* Présentation
* Témoignage
* Appareil critique
* Images

Aston, S. C.. Peirol. Troubadour of Auvergne. Cambridge: University Press, 1953

Code: 366,017 Auteur: Peirol Genre: Tenso (partimen) Numero: XXX

Gaucelm, diguatz m’al vostre sen

I 1
Gaucelm, diguatz m’al vostre sen
    qals drutz ha mais de son plazer—
    cel c’ab sa bona dona jai
    tot’ una nueit e non lo fai,
  5 ho cel qui ve a parlamen
    e no a lezer gaire
    mas quant d’una vetz faire
    e aqui meteis torna s’en.
     
II  
Peirol, al meu conoisemen,
  10 sel, c’una nueit hi pot jazer,
    deu ben aver dos tans de jai
    que sel qu’o fai e pueis s’en vai;
    qu’el jazer ha plazers tals cen,
    s’es qui be·ls sapcha traire,
  15 q’inz es meiller amaire
    qu’el fait c’om en tal cocha pren.
     
III  
Gaucelm, ben ha gran espaven
    aquel qu’es en autrui poder,
    que trastot’ una nueit i jai
  20 de lonc cella que plus li plai
    e non pot aver son talen
    ni sa voluntat faire;
    donc trai negus pecaire
    ins en enfern aital turmen.
     
IV 25
Peirol, molt vos razonatz gen!
    Estiers d’amor no faitz parer
    qu’en sapchatz tan con ieu en sai.
    Dizetz c’om ab sidons mal trai
    abrassan e baissan soven;
  30 segon lo mieu veiaire
    non es cortes amaire
    cui tals maltraitz fai espaven.
     
V  
Gaucelm, aisi non a conten.
    C’a dreg lo poscatz mantener
  35 si·l faires non es, quant s’eschai,
   
totz los autres plazers desfai.
    E qi recep son joi breumen
    en abans que repaire,
    aquel jois don es laire
  40 li dura pueisas longamen.

 

 

Institut d'Estudis Catalans. Carrer del Carme 47. 08001 Barcelona.
Telèfon +34 932 701 620. Fax +34 932 701 180. informacio@iec.cat - Informació legal

UAI