Aston, S. C.. Peirol. Troubadour of Auvergne. Cambridge: University Press, 1953

Code: 238,003 = 373,001 Auteur: Guionet , Peirol Genre: Tenso (partimen) Numero: XXXIV

Pomairols, dos baros sai

                     

I	1	Pomairols, dos baros sai
		pros et ab bonas genz
		es l’uns noiritz et estai
		et es plus que valenz;
	5	l’autr’ estai entr’ avol gen
		et a bon pretz valen.
		Veirem si saubretz chauzir
		a cal deu om mais grazir
		son bon captenemen.
II	10	Guionet, qui bos faitz fai
		entr’ omes conoissenz,
		ges de si mezeis no·ls trai;
		car lo bos noirimenz
		lo fai larc et avinen,
	15	per qu’eu prez per un cen
		celui que·s sap enantir
		entre·ls crois tan que fai dir
		que pretz a engalmen.
III		Peire, cel qu’enans se trai
	20	tant que·ls meillors en venz
		o fai meilz; c’om preza mai
		pels honratz venzemenz
		cel c’ab son afortimen
		venz maint baron valen
	25	c’autre qu’als crois fai fugir;
		car leu si pot enantir
		qui non troba conten.
IV		Guionet, ben vei com vai
		vostre razonamentz;
	30	en guerra·m tornatz lo plai
		lai on vos sofraing sens.
		Pero mult obra plus gen
		qui d’aigua fuec arden
		trai, que cel qui sap bastir
	35	un fuec d’autre, c’avenir
		i pot leujeramen.
V		Peire Pomairols, pretz trai
		cel que dels conoissenz
		e dels pros es caps; qu’eu sai
	40	que perdutz es l’argenz
		que l’autr’ els malvatz despen
		E·l faiz torn’ en nien,
		car pretz manda·ls pros servir;
		e qui·ls pros sap enantir
	45	n’a major grazimen.
VI		Gui, qui conqier pretz verai
		entr’ omes recrezenz
		a cui negus bes non plai,
		majer afortimenz
	50	es, car ab croi noirimen
		vai son bon pretz creissen
		que s’el creis ab gen noirir.
		C’un leon fai hom bordir
		qui lo sap noirir gen.
VII	55	Pomairols, lo jutgamen
		faza d’aquest conten
		en Reforzatz que sap dir
		e far tot can deu grazir
		bos pretz enteiramen.
VIII	60	Guionet, per bon l’en pren;
		mas n’Alazais qu’enten
		en tot bon pretz enantir,
		Poncelleta prec c’al dir
		lo guar de fallimen.