Poerck, Guy de. Bertran de Born: Molt m'es d'iscandre car col. "Annales du Midi", 73 (1961), pp. 19-33

Code: 080,028 Auteur: Bertran de Born Genre: Sirventes Numero:

Molt m’es d’iscandre car col

I	1	Molt m’es d’iscandre car col
		de gerra far ab castel,
		e car assaut ni cembel
		no·n vi·m mais aura d’un an,
	5	e teng m’o a grand affan
		car il n’estan per paor
		e nos autre per s’amor
		del seignor de Molïerna.
II		Que·ls agusa e·ls esmol
	10	e·ls tocha coma coutel
		lo seigner que ten Bordel,
		mas trop son espes denan
		e moz devas lo trenchan;
		e plus leial d’un prior
	15	merce del esmoledor
		tuich venran a vita eterna.
III		Ja·n Berlay de Mostairol
		ni·n Guillem de Mon Maurel
		no agren cor tan isnel
	20	com nostre baro cada an
		can ven al estiu intran;
		puois quan intra la fredor
		l’arditz torna en paor
		can lo clars temps s’abuerna.
IV	25	Del seignor de Mirandol
		que ten Grosa e Martel
		non cre ogan se revel
		tro que veia que faran
		Frances que van menassan
	30	e non son tant gabador
		ben non atendo·l pascor
		car oimais plou et inverna.
V		Aragones fant gran dol,
		Catalan e cill d’Urgel,
	35	car non an qui los chapdel
		mas un seignor flac e gran
		tal qe·is lauza en chantan
		e vol mais deniers q’onor
		e pendet son ancessor
	40	per qe·is destrui et enferna.
VI		Pos lo coms Richartz mais vol
		Benaujes sai pres Bordel
		qe Conhat ni Mirabel
		ni Chartres ni Sain-Joan,
	45	grieu cobrera Botenan,
		ni feira a son segnior
		braias moillar per paor,
		per q’ieu crei, Merlis l’esquerna.
VII		Lai vir on la denz mi dol
	50	vas cella de cui m’es bel
		q’ieu la repti e l’apel
		de tracion e d’ engan,
		car per son leugier talan
		sofre que·l fals feignedor
	55	s’anon feignen de s’amor
		de lieis que bon pretz governa
VIII		Eu sai un austor tersol
		mudat c’anc non pres auzel
		franc e cortes et isnel
	60	ab cui eu m’apel Tristan,
		e tot per aital semblan
		a·m pres per entendedor
		eta·m dat mais de ricor
		que s’era reis de Palerna.
IX	65	Tristan, per la vostr’ amor
		mi veiran torneiador
		en Peitau qui qe·m n’esqerna.
		Puois la raina d’amor
		m’a pres per entendedor
	70	ben pos far cinc et ill terna.