Javascript DHTML Drop Down Menu Powered by dhtml-menu-builder.comJavascript DHTML Drop Down Menu Powered by dhtml-menu-builder.comJavascript DHTML Drop Down Menu Powered by dhtml-menu-builder.com

* Introduction

* Présentation
* Témoignage
* Appareil critique
* Notes
* Traductions
* Images

Eusebi, Mario. L'Ensenhamen di Arnaut de Mareuil. "Romania", 90 (1969), pp. 14-30

Code: 030,VI Auteur: Arnaut de Maroill Genre: Ensenhamen Numero:

Razos es e mezura

1 Razos es e mezura,
  Mentr'om el segle dura,
  Que aprenda cascus
  De sels que sabon pus.
5 Jal sen de Salamon,
  Nil saber de Platon,
  Ni l'engens de Virgili,
  D'Omer ni de Porfili,
  Ni dels autres doctors
  10 Q'avetz auzitz plusors,
  No fora res prezatz
  S'agues estatz selatz;
  Per qu'ieu soi en cossir
  Cam pogues far e dir
 15 Tal re quem fos honors
  E grazit pels mellors.
  Mas negus non entenda
  Qu'en aquest fais m'enprenda,
  Que l'encrim de folhor,
 20 Nim tengua per doctor.
  De saber nom fenh ges
  Mas de so qu'ay apres
  Demandan et auzen,
  Escotan e vezen:
25 Car nulhs non a doctrina
  Ses autruy dessiplina.
  Mos sabers non es grans
  Ves quem tiral talans
  D'aprendre e d'auzir
 30 So c'onz degues grazir.
  Que eys lo meu apenre
  Si nulhs es de mi mendre
  De sen ni de sciensa?
  Segon ma conoissensa
35 Qu'ieu ai ni sent ni sai,
  Al segle mostrarai
  Cossis deu captener
  Qui vol bon laus aver.
  Mas coven agarar
 40 Con o dey comensar,
  Car sens non es grazitz
  Mas per los essernitz,
  E d'aquels no son guaire:
  Per so o vuelh retraire
45 Al rey cuy es Lerida,
  Cuy joys e jovens guida,
  Primieiramen mos ditz,
  Si com los ai escritz;
  Non per so quel sofranha
 50 Res c'a bon pretz s'atanha;
  Mas car es conoissens,
  En totz fatz avinens,
  Lo prec que m'o esme
  Si eu y falh en re.
55 Qui vol corteza vida
  Demenar ni grazida,
  Ab ferm cor e segur,
  Per tal que son pretz dur,
  Sapch'amar dieu e temer
 60 Honrar e car tener:
  Car pretz ni cortezia
  Ses dieu non cre que sia.
  De totas encontradas,
  Estranhas e privadas,
65 Aprenda de las gens
  Fatz e captenemens,
  E deman et enqueira
  L'esser e la maneira
  Dels avols e dels bos,
70 Dels malvatz e dels pros.
  Lo mal el be aprenga
  El mielhs gart e retenga;
  Tot cant es deu saber
  E deu ben retener,
75 Pueys poiras mielhs defendre
  Quil volra sobreprendre.
  Ja non aura proeza
  Qui no fug avoleza,
  E non la pot fugir
80 Qui non la sap chauzir.
  Ni cortez non er ja
  Qi non conois vila,
  Ni bos, si dieu mi sal,
  Si non conois lo mal.
85 Per so nos deu tardar
  D'auzir e d'escoutar
  Mas per mon essien
  Sel qu'en bon pretz enten:
  Entrels nessis els fatz
 90 Sap chauzir lo senatz
  Tal res que lui es bos,
  Et ad els non ten pros.
  Qui sap sens e foldatz
  Melhor n'es sos solatz,
95 Car li ris e li joc
  An lur temps e lur loc
  On se fan a retraire
  Per sels c'o sabon faire.
  Del segle us dic aitan
 100 Segon que m'es semblan:
  Selui te honz per pro
  Que sap gardar sazo
  De sas antas venjar
  Els bos gazardonar,
105 C'aiso es bos uzatjes,
  E requier o paratjes,
  C'onz sia humils als bos
  Et als mals ergulhos.
  Mas una ren dirai
110 Segon lo sen qu'ieu ai:
  Non an proeza bona
  Jes totz sels qu'om razona,
  Qu'entrels desconoissens
  Es per avols guirens
115 Proeza forsjutjada
  E per mans autrejada
  Qu'anc non saubron que fos
  Proeza per razos.
  Proezas son devizas
 120 E pretz de mantas guizas:
  Les unas son cabals,
  E las autras venals;
  Mas, qui que pes o plassa,
  Ieu non dic ges que fassa
125 Pretz de gap ni d'ufana
  De proeza certana,
  C'ab son don s'asegura
  Tan cant el segle dura.
  Qui proeza dezira
 130 Fols es <quan> non cossira
  Don nays ni don soste,
  Car ses aiso non cre
  Que nulh honz bon pretz aia,
  Qui que s'en crit nin braia.
 135 Per fat razonador
  Qui non conoys folor
  En si ni en autruy
  Non son, si tot s'enbruy,
  Ges pros tug li lauzat
140 Ni avol li blasmat.
  D'estz no vuelh pus parlar,
  Mas laissarai estar
  Los pros ab los prezatz
  Els nessis ab los fatz,
 145 E si dirai ais jays
  De proeza don nays.
  Ges no nais ni comensa
  Segon autra naissensa,
  Qu'ins el cor, so sapchatz,
150 La noiris voluntatz;
  E nous sia veiaire,
  Si filhs fo de bo paire
  C'onz pros es meravilh
  Si non pareys al filh.
155 Terras pot honz laissar
  E son filh eretar,
  Mas pretz non aura ja
  Si de son cor nol tra;
  Per que pretz senhoreya,
160 E cre que far o deya,
  Sobre totas honors
  E n'es caps e colors.
  Paratje d'auta gen,
  Poders d'aur ni d'argen
165 Nous daran ja bon pretz
  Si ric cor non avetz,
  Ric cor sens desmezura,
  Que d'autre non ai cura.
  Proeza eis de coratje,
170 Veus lo meilhor linhatje;
  Et entendetz apres
  Per cuy estay en pres:
  Conoissensa e sabers,
  Sens, largues'e poders
175 Dono pretz per tos temps,
  Quils sap aver essem.
  En aquest .v., sous plieu,
  Proeza renh'e vieu
  Conoissens'e largueza
180 Son las claus de proeza;
  Poders es la cerralha,
  E qui jen, sen baralha,
  Non la sap desfermar,
  Non pot guaire durar.
185 Per quel sens y cove
  Que las claus gar'e te.
  Sabers n'es messatgiers
  Cortes e plazentiers
  Qui ditz plazers nils fay
190 Lay on ve que s'eschay
  Ses aquest .v., no vey
  Emparador ni rey,
  Duc, comte ni baro, 
  Ni nulh autre home pro,
195 Qui puesca pretz durar,
  Si bes fan razonar.
  Li flac ric de paratje,
  Sofrachos de coratje, 
  Fan dir a lurs privatz: 
200 «Senher, aitan sapchaz,
  Mo senher fora pros
  Ab que poders y fos».
  Aquest razonamens
  Es us devinamens: 
205 Qu'ieu no y conosc ren al,
  Ni alre non lur val, 
  Ni ja nols en creirai, 
  Qu'ieu conosc ben e sai 
  Que ancse fo et er 
210 Que totz pros honz conquier 
  Ab sen et ab saber
  Et ab bon cor poder.
  Pero ieu ges non dic 
  Que aisels c'an cor ric
215 Puescan far tota via 
  Tot cant bels estaria;
  Mas qui tan com pot fay
  D'aco c'a pretz s'eschay,
  De qualque poder sia,
220 Pro es senes falhia.
  Pero non entendatz
  Qu'ieu a totz los prezatz 
  Autrei proeza enteyra; 
  En nenguna manieira 
225 En cort non o diria, 
  Car sai qu'ieu falhiria.
  Pretz y a et lauzors
  De diversas colors,
  Car tug sill que pretz an 
230 Non l'an ges d'un semblan. 
  Li cavayer an pretz 
  Si com auzir podetz:
  Li un son bon guerrier,
  L'autri bon conduchier; 
235 L'un an pretz de servir, 
  L'autri de gen garnir; 
  L'un son bon cavallier, 
  L'autr' en cort prezentier. 
  Sils aibs que us ai comtatz 
240 Son greu essems trobatz, 
  Mas qui may n'a ab se, 
  May de bon pretz rete; 
  E qui nengun non a, 
  Si ja pueis li rema 
245 Lo nonz de cavayer, 
  Nol tenc per dreiturier. 
  Las donas eyssamens 
  An pretz diversamens: 
  Las unas de beleza, 
250 Las autras de proeza; 
  Las unas ben parlans, 
  Las autras benestans; 
  Las unas son plazens, 
  Las autras conoissens. 
255 A domna, so sapchatz, 
  Esta mot gent beutatz;
  Mas sobre tot l'agensa
  Sabers e conoissensa 
  Quel fa cascun onrar
260 Segon ques tanh a far. 
  Li clerc, per cuy ancse 
  Sab hom lo mal el be, 
  An pretz si con s'eschai, 
  Aital cum ieus dirai. 
265 L'un de bona clercia, 
  L'autre de cortezia; 
  Li un de gen parlar, 
  L'autri de ricx fatz far; 
  Li un de gran bontat, 
270 L'autri de larguetat. 
  Dels autres no son mot, 
  Enans m'en lays del tot; 
  Qui no fai be nils ditz 
  Nol lays mestz los grazitz, 
275 Ni sera en ma carta: 
  Ans dic ben que s'en parta. 
  Et enaisi, senhors, 
  Diversas son lauzors 
  Donadas a cascu; 
280 Mas non y a negu, 
  Ja celar no us o quier, 
  Dona ni cavayer, 
  Ni clerc, so m'es veiaire, 
  C'us honz puesca retraire 
285 Aisi pres de tot fi 
  Qu'om non truep que y desni,
  Qu'aisi parti natura, 
  Gracia et aventura 
  Lo don entre las gens 
290 C'us non es tan valens 
  Ni tan aventuros 
  El segle ni tan pros,
  De calque poder sia,
  Qu'en alcuna partia
295 De lauzor nol sofranha
  Tal re don se complanha. 
  Mas ja li pus prezat 
  No m'en sapchan mal grat 
  S'ieu dic lurs malvestatz, 
300 Car yels n'ay ben proatz 
  Qu'ades son sordeyor
  On pus an de ricor. 
  Doncs qui may ditz e fay 
  D'aco qu'a pretz s'eschay 
305 Pro es aventuros 
  Cant es melher dels bos. 
  Vers es, so aug retraire, 
  Qu'el temps del premier paire, 
  Des que cregon las gens, 
310 Per bos captenemens 
  Elegron poestatz, 
  Per tals qu'en els fos patz
  E merces e mezura 
  E larguez'e dreitura 
315 Maiormen qu'en autruy. 
  Mas s'eras non destruy
  Aisel qu'a son vezi, 
  Cascus e non aussi 
  Non cuida esser prezatz, 
320 Tant es otracuidatz 
  Lo segle descauzitz, 
  Dessebratz e partitz 
  De sen e de proeza, 
  E mesclat ab maleza. 
325 Ieu o planc per joven 
  E pel destric que y pren, 
  May que no fas per me, 
  Qu'a me non greuja re. 
  Sil segles se dechai
330 Non puesc aver esmay 
  De res que veya far, 
  Ab sol que dieus me gar 
  Ma dona doss'e cara 
  Quem capdela em gara 
335 De tot autre cossir
  Mas de lieys obezir. 
  Pros dona e valens, 
  Corteza et conoissens, 
  S'en ren ai conoissensa, 
340 La vostra sovinensa, 
  Que m'es d'enuei escrima, 
  Lam dona e la m'aprima: 
  Per qu'eu de totz mos bes 
  Vos ren laus e merces 
345 E us o grazisc ades, 
  Car m'es del cor pus pres,
  Dona.

 

 

 

Institut d'Estudis Catalans. Carrer del Carme 47. 08001 Barcelona.
Telèfon +34 932 701 620. Fax +34 932 701 180. informacio@iec.cat - Informació legal

UAI