Strempel, Alexander. Giraut de Salignac, ein provenzalischer Trobador. India: Pravana Books, 1916

[CdT en procés d'incorporació]

Code: 249,003 Auteur: Guiraut de Salaignac Genre: Plazer Numero: I

Esparviers et austors

I	1	Esparviers et austors
		E guirfals prendedors
		E falcos voladors
		E ‘smirles montadors
	5	Voill eu, e pro de renda
		Am que met’e despenda,
		Qu’enaissi m’er honors;
		Que a totz los meillors
		Voill far don et esmenda.
II	10	Bos levrers volvedors,
		Liamers fresadors
		Voill e los venadors
		E chins de sers odors,
		E qu’eu lo glat entenda!
	15	Be·m platz aitals fazenda;
		E voill bos chantador
		E bos violadors,
		Car solaz si remenda.
III		Palafres ambladors,
	20	Beus e plans portadors
		E destrers corredors,
		Mainz seignals de colors
		Voill eu e mainta tenda,
		E qu’om per tot mi venda
	25	Tan qu’en don als plusors;
		Als grans et als menors
		Voill donar lor vivenda.
IV		Reis et emperadors,
		Ducs, marques et contors,
	30	Chastellans, valvassors —
		Tant es granz ma ricors
		Qu’ieu·s voill! — a mi s’atenda
		E mos pretz no·i deissenda!
		Tant voill d’envaidors
	35	Que castels fortz ni tors
		Contra mi, no·s defenda
V		Los livres dels auctors
		Sai e dels ancessors,
		Los sens e las follors.
	40	Res no·m faill mas amors.
		O genser, cui port benda!
		Voilla c'a mi se renda,
		Si tot s’es caps e flors
		De totas las gensors. —
	45	De mi merces vos prenda!