Strempel, Alexander. Giraut de Salignac, ein provenzalischer Trobador. India: Pravana Books, 1916

[CdT en procés d'incorporació]

Code: 235,002 Auteur: Guillem de Salaignac Genre: Descort Numero: III

Per solatz e per deport

I	1	Per solatz e per deport
		Me conort
		E·m don alegransa,
		E ja non feira descort
	5	S’ieu acort
		E bon acordansa
		Trobes ab lieys qu’am pus fort;
		C’autre tort,
		Vos dic ses duptansa,
	10	No l’ai mas l’amor que·l port;
		Pieitz de mort
		Me vol per semblansa.
II		Mas de lausengiers mi lau,
		Quar fan cuydar qu’eu am alhor
	15	E pueys demando·m que fau,
		Ni on ai pauzada m’amor;
		Et yeu, quar son mal e brau,
		Tem los tant que dirai la lor:
		La genser es qu’hom mentau,
	20	E la mielher de sa ricor.
III		Francha, de bella paria,
		Gen parlan, de belh solatz
		La trobaretz quascun dia,
		E tot quan fai ni ditz, platz.
	25	Sens e pretz e cortezia,
		Guayez’ e fina beutatz
		Estan ab lieys nueg e dia,
		Sitot enueja·ls malvatz.
IV		D’al re no cossire,
	30	Mas s’amor dezire
		Que·m des!
		Siey dols plazent rire
		M’an donat martire
		Engres.
	35	On qu’eu m’an ni·m vire,
		El cor la remire
		Ades;
		E pes e cossire
		E no l’aus ges dire
	40	M’ames;
V		Que’l sobramors qu’eu l’ai, m’en te
		E paors que l’enueg dese;
		Mas en luec de clamar merce
		L’ai fin’amor e bona fe;
	45	Qu’en tant quan mars ni terra te,
		Non a tan fin aman cum me.
		La valens reyna rete
		Dompney, fina beutat ab se
		Part totas las dompnas qu’om ve,
		E non ai sobredic de re:
VI		De Monferriol no dic re,
		Mas valor e fin pretz mante.