Strempel, Alexander. Giraut de Salignac, ein provenzalischer Trobador. India: Pravana Books, 1916

[CdT en procés d'incorporació]

Code: 249,005 Auteur: Guiraut de Salaignac Genre: Tenso Numero: 1

En atretal esperansa

I	1	En atretal esperansa
		Cum selh que cass’e no pren,
		M’aura tengut lonjamen
		Amors que·m don’e·m’estray,
	5	Et ieu quo· l joguaire fay
		Que sec juec perdut e·l te,
		Sec mon dan e fug al be.
II		E quar lo dans m’es honransa,
		Prenc em patz lo mal qu’ieu sen,
	10	Qu’ieu trac per la plus valen;
		E suefr’o, pus a liey plai.
		Mas plus greu m’es quar ieu sai
		Que blasme n’aura iasse,
		Si·m fai murir que pert me.
III	15	Quar ab sos belhs huelhs mi lansa
		Un amoros pensamen
		Si que·l cor enteiramen
		Mas i pres qu’ieu ges non l’ai,
		E si ’smenda no m’en fai
	20	Del sieu cor, pus lo mieu te,
		Sapcha en ver que muer me!
IV		Mas denan totas s’enansa
		Vas pretz, vas valor, vas sen,
		E miels parla e plus gen,
	25	So dizo·l pros e·l savay;
		Et ieu am la miels e may
		No fes Piramus Tibe.
		Tan l’am que d’als no·m sove.
V		De gratz mi fares honransa
	30	Per miels suffrir mon turmen,
		Plazen dona, en cuy enten!
		Per vos mort o grat n’auray,
		Quar res no·m fai tan d’esglay
		Cum vos qui am mais que re,
	35	Que·m fassatz mal e non be.
VI		Et er grans desmezuransa.
		Si·m faitz mal, pus no·m defen;
		Qu’eu non trac autre guiren,
		Mas franx e fis vos serai
	40	Miels qu’eu mezeis dir no sai;
		E pus tan vos am e·us cre,
		Ben degra trobar merce!