Strempel, Alexander. Giraut de Salignac, ein provenzalischer Trobador. India: Pravana Books, 1916

[CdT en procés d'incorporació]

Code: 249,001 Auteur: Guiraut de Salaignac Genre: Canso Numero: 2

Ajssi cum selh qu’a la lebre cassada

I	1	Ajssi cum selh qu’a la lebre cassada
		E pueys la pert et autre la rete,
		Tot atressi es avengut a me
		D’una falsa qu’ai lonjamen amada
	5	E servida de bon cor humilmen,
		E quan cugei penre mon iauzimen,
		Pres sordeyor e mi mes en soan.
		Aissi o fetz cum las lobas o fan.
II		Mas si razos mi fos adreg iutjada,
	10	Savals ma part en degr’ieu aver be
		De s’amistat, don ara no·vuel re;
		Quar tal dona m’a s’amor autreyada
		Que genser es a mos ops per un cen
		E val trop mais a lau de tota gen.
	15	Fin’ e lials e senes cor truan,
		Per qu’ieu l’am mais no fetz Auda Rotlan.
III		Soven soplei vas la douss’ encontrada
		On ilh estay e sitot noca·m ve,
		Ieu la vey ben e mon cor, per ma fe!
	20	Quar manhtas fetz l’aurai somnhan baizada
		En ai agutz mil plazers en dormen;
		D’aquelh demor ai plus mon cor iauzen,
		Quant be m’o pes ni m’o vau remembran,
		Que s’autra·m des tot so qu’a lieys deman.
IV	25	E sitot m’a l’amistat trop tardada,
		Per merce·l prec qe vas me non malme;
		Quez ieu l’am tant leialmen, so·l cove,
		Qe null’autra del mon tant no m’agrada,
		S’ieu anc l’amei n’i pauziei mon enten.
	30	En lui ai mes trestot lo cor e·l sen,
		A leis mi don de bon cor e·m coman
		E ill fassa de mi tot son talan.
V		D’Amor mi lau qar mi a·n emendada
		Tota l’ira qu’el me dona anse.
	35	Si ma dompna agues tant de merce
		Que la promessa no·m sia vedada,
		Quan la verai, e aco er breumen.
		E pasaras al pro conte vallen,
		Cel de Rodes, q’a fin prez ses engan,
	40	Et aiquest iorn uai sa vallor doblan.