De Bartholomaeis, Vincenzo. Poesie provenzali storiche relative all'Italia. Volume primo con ventiquattro silografie. Roma: Tipografia del Senato, 1931

[CdT en procés d'incorporació]

Code: 217,008 Auteur: Guillem Figueira Genre: Sirventes Numero: CXXXIV

Un nou sirventes ai en cor que trameta

I	1	Un nou sirventes ai en cor que trameta
		A l’Emperador a la gentil persona;
		Qu’eras m’a mestier qu’en son servizim meta,
		Que nulhs hom plus gen de lui non guazardona;
	5	Qu’elh gietal paubre de paubreira
		El valen melhura e reve;
		Per qu’es dreitz qu’el guazanh e conqueira,
		Pus tan fai d’onor e de be;
		Per que quascus hom deu benezir la via
	10	De tan bon senhor, per on el va e ve;
		Et ieu benezisc lei per madona Dia
		E per En Taurel, quar tan gen se capte.
II		Non tenc per senat home que s’entremeta
		De far a lui tort, qu’om plus greu non perdona
	15	Tro ques pot venjar; e guardatz de Gayeta
		Cum el la destruis; fols es qui ab lui tensona!
		Quar trop es sa forsa sobreira;
		Quar li tensonet no sai que
		. . . . . . . . . . . . . . . . . . . . . . .
		. . . . . . . . . . . . . . . . . . . . . . .
	20	Mout be s’es venjat de la falsa clercia
		E del Papa, miellas que sos avis no fe:
		Segurs pot estar dedins s’albergaria,
		Que tug siei guerrier li van clamar merce.
III	25	En bon ponh fon natz et en bona planeta
		Nostr’Emperaire, qu’om a tort ochaizona;
		Qu’eras son Lombart vengut tro a Barleta
		Per rendre a lui totz los dregz de la corona;
		E Genoalh ren la Ribeira
	30	E totas las terras qu’ilh te,
		E tant es issida sa baneira
		Qu’om nos pot defendre a se;
		Ad aital senhor tanh ben la senhoria,
		Quar el sap be far so ques tanh nis cove,
	35	Et es tan sabens d’Artz e d’Estronomia
		Qu’el ve e conois enans so que ave.
IV		Mout fes Outramar onrad’obra e neta,
		Que Jherusalem conques et Ascalona;
		Que anc no i pres colp de dart’ ni de sageta,
	40	Quan li fel Soudans honrada patz e bona;
		Pueis tenc en Chipre sa careira
		E lai mostret tan bona fe
		E mostret lialtat tan enteira
		Qu’al don de Barut en sove,
	45	Cui sols s’eretat per gentil cortezia
		Francs Emperaire, que n’a tot lo cor ple
		E net e lavat de tota vilania,
		Plen de larguetat, e quis vol creza ’n me.
V		E qui no m’en cre damand’en a Berreta
	50	O als cavayers de Parm’e de Cremona,
		Aquel de Daruelh carguat una carreta
		E mil onzas d’aur; ben aja, qu’aissi dona!
		Totz temps n’amarai mais Figueira
		Que de lui lauzar nos recre
	55	Ni non ditz paraula messongeira
		De l’Emperador; que jasse
		Lo sans Dieus li guart tota sa manentia,
		Si cum elh ama verai pretz e mante;
		E a mi don Dieus gaug d’amic d’amia
	60	E don joi al comte Ramon qu’onor soste.
VI		Belhs amics Taurels, vostra mercadaria
		Vos la vent hom mal, e vos vendetz la be.
VII		Belhs amics Taurels, vos e madona Dia
		Devetz ben amar selh c’a nom de ric fre.