Javascript DHTML Drop Down Menu Powered by dhtml-menu-builder.comJavascript DHTML Drop Down Menu Powered by dhtml-menu-builder.comJavascript DHTML Drop Down Menu Powered by dhtml-menu-builder.com

* Introduction
* Notice Bibliographique
* Vocabulaire

* Présentation
* Bibliographie
* Témoignage
* Appareil critique
* Notes
* Traductions
* Images

Squillacioti, Paolo. Le poesie di Folchetto di Marsiglia. Pisa: Pacini, 1999.

Nuova edizione riveduta e aggiornata per il "Corpus des Troubadours", 2009.

Code: 155,003 Auteur: Folquet de Marselha Genre: Canso Numero: VI

Ai! quan gen vens et ab quan pauc d'afan

I   Ai! quan gen vens et ab quan pauc d’afan
    aissel que·s laissa venser ab merce!
    quar enaissi vens hom autrui e se,
    et a vencut doas vetz senes dan;
  5 mas vos, Amors, non o faitz jes aissi,
    c’anc jorn merces ab vos no·m poc valer,
    ans m’avetz tan mostrat vostre poder
    qu’era no·us ai ni vos non avetz mi.
     
II   Per que·m par fols qui non sap retener
  10 so que conquer, qu’ieu prez ben atrestan
    qui so rete que a conquist denan
    per son esfors quom fatz lo conquerer;
    mas aissi·m retengratz quo·l fols rete
    l’esparvier fer, quan tem que si desli,
  15 que l’estrenh tant el poynh tro que l’auci;
    mas pus estorz vos sui, viure puesc be.
     
III   Tot so que val pot nozer atressi,
    donc, s’ie·us tenc pro be·us poirai dan tener,
    et er merces s’ab eis vostre saber
  20 que m’avetz dat, don anc jorn no·m jauzi,
    vos mou tenson ni·us dic mal en chantan!
    mas non er fach, que chauzimens m’en te:
    enanz vuelh mais mon dan sufrir jasse
    que·l vostres tortz adrechures claman.
     
IV 25 On trobaretz mais tan de bona fe?
    c’anc mais nuls hom se mezeis non tray
    son escien, si com ieu que·us servi
    tan lonjamen, qu’anc no·n jauzi de re;
    ar quier merce? so faria parer,
  30 quar qui trop vai servizi repropchan
    semblansa fai que·l guazardon deman;
    mas ja de mi no·us cugetz que·l n’esper.
     
V   E qui·l bon rey Richart qui vol qu’ieu chan
    blasmet per so quar non passet dese,
  35 ar l’en desmen si que chascus o ve;
    qu’areire·s trais per miels salhir enan:
    qu’el era coms, ar es rix reys ses fi,
    quar bon secors fai Dieus al bon voler;
    e s’en dis ben al crozar, ieu dis ver,
  40 et ar vei m’o, per qu’adonc no menti.
     
VI   Ja N’Azimans ni·N Tostemps non creiran
    qu’ieu vas Amor aia virat mon fre;
    mas ben pot hom creire aisso que ve
    et er saubut oimais d’aissi enan.

 

 

Institut d'Estudis Catalans. Carrer del Carme 47. 08001 Barcelona.
Telèfon +34 932 701 620. Fax +34 932 701 180. informacio@iec.cat - Informació legal

UAI