De Bartholomaeis, Vincenzo. Poesie provenzali storiche relative all'Italia. Volume primo con ventiquattro silografie. Roma: Tipografia del Senato, 1931

[CdT en procés d'incorporació]

Code: 461,133b Auteur: Anonyme Genre: Planh Numero: CXC

Glorios Dieus don totz ben ha creysensa

I	1	Glorios Dieus don totz ben ha creysensa,
		Vos prec, prezant, deziros am dezir
		Denhes, sius play, lo mieu cor esclayzir
		Que yeu puesca dir e retrar a present
	5	Planh amar, doloyros e cosent;
		La Lenguadoc en deura sospirar
		E Proenzals planher e gaymentar.
		Amara mort, ben nos as fach offensa:
		De bon senhor descaptalat Prozensa!
II	10	Vera valor valent an gran valensa:
		Lo puesc nompnar ses tot falhiment.
		Hoy rey Robert, de bons ayps compliment,
		Cap e razis, en siensa fondat!
		Perdut avem la real Magestat
	15	De Cessilia! Hoy contat de Proensa,
		De bon senhor vos aves defalhensa!
III		Plans, plors e critz deu far tota Proensa,
		Petitz e grans; yeu vos diray perque:
		Amava los trastotz en bona fe,
	20	Car per tostemps los ha trobatz leals.
		Amara mort, ben yest descumenals,
		Car nos as tout la flor d’aquist lengage!
		Ay, rey Robert, gran perdan fa parage!
IV		Del rey Robert motz bons homs prenian gage:
	25	Ar covenra tornen en lur pays!
		La sieua mort planh hom dedins Paris,
		Per autres luocx, cant auzon renompnar
		Las soas bontatz en que a volgut renhar.
		Homs que annes a Napol, on estava
	30	Desconselhat, lo Rey los conselhava.
V		Hoy rey Robert, gentil flor de nobleza,
		Tan bon senhor qui poyra mays trobar?
		Talhas, questas nul temps non fes levar
		En Prozensa: tengutz los a en patz.
	35	Lo veray Dieus, qui en cros fon levatz,
		La sieua arma non meta en rancura,
		Mays lay on gaug tostemps dura.
VI		Mager dolor hom non auzi retraire
		Com aquel jorn quel bon Rey volc fenir.
	40	Sos cavalliers denant si fes venir;
		La Regina y fon premierament;
		En sospirant lur dis mot humilment:
		«Senhors totz, yeu requeri vos perdon»;
		Aysi con poc comenset son sermon:
	45	«Viscut sa ay coma forfag peccayre».
		. . . . . . . . . . . . . . . . . . . . . . . . . . . . .
VII		Lo jove Rey, filh qu’es d’aquest d’Ongria,
		Tot en plorans, dizon quel vay bayzar.
		«Es oy, felen, vulhat Dieus amparar:
	50	Ben covenra que tu sias suptils;
		E pregue ti vulhas esser humils
		A la Gleya; si o yest, Dieus lo Paire
		En totz destricx ti sera capdellayre.
VIII		E pueys ti prec que Proenza captengas
	55	Coma leyals que son e ses engan;
		Si mestier t’es, aquels s’ajudaran,
		Sol quels ames e los tengas en pas;
		Paga los ben: enaysi los auras
		Bons e leyals, si mestier ti fazia,
	60	Sercan premiers, com son agut tot dia».
IX		Ans que fenis lo rey Robert d’onransa
		El fes venir son Vicicancellier,
		E volc saber si tug li saudadier
		Eran pagat; el respondet que non;
	65	Lo noble Rey, com savi, digne e bon,
		Ha comandat que totz homs pagatz sia
		Tro un denier, a qualque part que sia.
X		Pietat fo a tot hom que auzia
		Lo rey, lo rey Robert, ans que fenis:
	70	«Comanda mi al Rey de San Daunis,
		De Malhorca, et a cel d’Aragon;
		Aquel Senher que sufri Passion
		Lur done pas a totz cominalment,
		Et al Sant Payr done cor e talent;
	75	C’om regisca, az onor de Dieu sia:
		Tug son mortals e non sabon lo dia».
XI		La gent que l’aus mot gran dolor avia.
		Tant humilmens los comandet a Dieu:
		«A Sant Loys volgra esser romieu,
	80	Si a Dieus plagues, al sieu digne autar;
		Dieu Ihesu Crist vuelha per mi pregar;
		A la Verge humil santa Maria
		M’arma comant l’aya en sa baylia».
XII		La gran dolor retrayre non poyria
	85	Que menavan cels qu’eran environ.
		Lo rey Robert, eu’ Dieus fassa perdon,
		Neps e nessas fes venir davant si;
		Fort deziret de vezer lo Dalfi,
		Car el era del sanc e del linhage:
	90	«Saludas lom», so dis a sson barnage,
XIII		«E digas li que de mi li sovenha,
		Que per m’amor obtenga Prozenzals:
		Los Masselhes, car son bons e lyals,
		Per mi an suffert trebals e grans dolors;
	95	En Cisilia son agutz corajos
		E mal pagat; don mi sap mal ses falha;
		Dieus sia amb els, els gart totz de trebalha».
XIV		Ans que fenis lo Rey, si con podia,
		A son heres preguet mot caramens
	100	Que los Bausenx ames totz coralmens:
		Lo com novel e los autres trastos,
		Cel d’Evilli e totz sos valedors:
		«A trastotz prec que, per Dieu, lur sovenha,
		Tant com poyran, que l’un l’autre captenha».
XV	105	Paraula dis que es ben de retrayre
		Lo rey Robert, enans que el moris:
		«Aportas mi davant la Flor-de-lis».
		Pueys la bayzet e dis tot sospirant:
		«Al Rey cuy es bel filh non sias enfant;
	110	Covenra ti que optengas la Flor;
		Si la Gleya fazia emperador,
		Non perdas ren per lo tieu volpilhage,
		Mays pren espilh de tot nostre linhage:
XVI		«Con an regit ni la Flor manteguda
	115	Nostres payrons: lo rey Carle premier;
		Lo miey payre a mant bon saudadier
		A donat sont; el Duc, qu’era mon filhs,
		De Calabria ha suffert motz perilhs
		Per mantener la terra de Cisilia;
	120	Fay tu aytal: capten la senhoria».
XVII		En sa vida lo rey Robert estava,
		Pensant en Dieu, an gran affection;
		E fon la nueg de l’aparission.
		Dieus li trames son Angel e dis li:
	125	«Hoy rey Robert, tu yest pres de la fi».
		Lo jorn li dis ques el morir devia;
		Las mans jonchas, ves lo cel s’umelia.
XVIII		Sos dos nebotz regardet e sa boda;
		De sus lo cap la corona pauzet
	130	De son felen; mot dousament ploret:
		«Del Realme te revesti, belh filh,
		E sant Loys ti gart de tot perilh;
		E membre ti de tos cozins tot dya;
		Ampara los trastotz per amor mia».
XIX	135	Amb umil cor lo Rey, si con podia,
		Ans que fenis, dis: «Nous meravilhes
		Si ay revestit lo rey Andrieu, c’uey es,
		Del Realme, car dreg es e razon:
		Carle Martel, lo sieu avi que fon
	140	E mon frayre, de mi fon premier nat;
		Degra regir miels que yeu lo Regnat;
		Consiensa del tort per cert avia;
		Per que yeu vuelh que als sieus tornat sia».
XX		Lo Rey auzi que la Donna planhia;
	145	Aysi com poc el la va confortar:
		«Huey es lo jorn Dieus mi vol appellar;
		El sia grazit que pron sa ay vescut;
		Pueys que a Cel plas, son voler m’es salut;
		A Sel me rent; quan quel peccayre sia,
	150	M’arma, mon cors meta en sa baylia».
XXI		Adoncx feni; don fon mot gran pezansa.
		Qui vi raubas trencar e mans vestirs,
		Caras, cabels; plorar e far grans critz;
		Non y ac negun non menes gran dolor,
	155	Dizent aysi: «Mot perdem bon senhor!
		La sieua arma non puesca sufrir pena!»
		Gran fon lo dol que tota sa gent mena.
XXII		Gran dolor fon qui auzi la depertida
		Del rey Robert am la Dona gentil;
	160	La Regina va gitar un gran quil:
		«Ay, bona amor, temps es que nos partam!
		Si a Dieu plagues, volgra esser avan
		Morta que vos; mas, pueys que Dieu lo Payre
		Ho vol aysi, yeu non puesc al re fayre!»
XXIII	165	Ben deu planher tota la sancta Gleya
		La sieua mort, car en tot son vivent
		De la Gleya es agut son sirvent,
		Gonfaronier de papa Quin Clement;
		E del Seyzen el fora eysament,
	170	Si agues vescut; captengra lo tot dya;
		Fe sperital en el bon pe avia.
XXIV		De la razis el es mogut de Fransa,
		Per que Frances lo devon sospirar,
		E de sa mort planher e gaymentar;
	175	Lo rey Robert mant hom lo planhera;
		Tals portamens en sa vida fach a
		Que tota gent en deu aver pezansa,
		Especialmens lo noble Rey de Fransa.
XXV		Com d’Evelli, aquel planh e sospira
	180	La mort del Rey: el n’a dreg e razon,
		Car l’amava de fin cor e de bon;
		An pauc lo cor de trastot nol falhi;
		Cant aus la mort, el ha dig cap encli:
		«Bel Senher Dieus, ben m’as dcscapdellat
	185	De bon senhor, mas Dieus en sia lauzat,
		E la Verge humil santa Maria
		La sieu arma tenga en sa baylia!»
XXVI		Complansa, vay senes tota bestensa
		Per los pays de Levant al Ponent;
	190	Per Proensa passa premierament;
		Dedins Nissa tu t’en vay comensar
		Tro la Verge Sancta-Mari’-a-la-Mar;
		Per Masselha passaras e per Arle
		Tro aqui s’estent lo poder del rey Carle.
XXVII	195	Ad Ayx t’en vay, complancha, senes falha
		Petitz e grans humilmens saludar,
		Com un dels luox quel Rey solia amar
		De Proensa; prega devotament
		Santa Clara, per lo bon Rey valent:
	200	En Paradis avocada li sia:
		Totz sos clamans de destric gardatz sia!
XXVIII		Ad Avinhon t’en vay pueys, al sant Payre,
		Car razon es, e pueys als cardenals,
		Al College, pueys a totz los Reals;
	205	A qui es cap e razis de la Fe
		Lo veray Dieu, que tot lo mon soste,
		L’arma del Rey no sufra nulha pena
		Totz en preguem humil, de gracia plena.
XXIX		A sant Loys, ver cors sans de Masselha,
	210	Complancha, vay an gran devocion;
		Aquel Senher que sufri Passion
		Pregue, si plays, per lo Rey cabalos,
		Que aja l’arma el Regne glorios,
		E l’acuelha el sieu digne repayre
	215	Hon gaug ses fi a tot fizel peccayre. Amen.