Mouzat, Jean. Les poèmes de Gaucelm Faidit. Troubadour du XIIe Siècle. Paris: A. G. Nizet, 1965

Code: 167,030 Auteur: Gaucelm Faidit Genre: Canso Numero: 9

Ja mais, nuill temps, no-m pot ren far Amors

I	1	Ja mais, nuill temps, no-m pot ren far Amors
		qe-m sia greu, ni malstraitz ni afans,
		que tant mi fai eras valen socors
		que las perdas mi restaura, e-ls dans
	5	c’avia pres a dreich per mon follatge ;
		e si, anc jorn, mi fetz en ren marrir,
		er li perdon lo destric e-l dampnatge,
		c’a tal dompna fai mos precs acoillir,
		don m’esmenda tot qant m’a faich sofrir.
II	10	Mout mi saup gen mon cor d’autras partir
		et ajostar a lieis totz mos talans —
		lo jorn qe-m fetz Amors doptan venir
		vas la bella, don us cortes semblans
		dels sieus bels huoills m’intret inz el coratge
	15	si que anc puois no-l puec virar aillors,
		adoncs saup ieu que l’uoill m’eron messatge
		d’amor, c’al cor mi venc freitz e calors,
		jois e consirs, ardimens e paors.
III		Aquel esglais, et aquella temors,
	20	m’afinet si mon cor, ses totz engans,
		c’ans puois vezers d’autra n-m fo sabors,
		ni tot cant ieu avia vist enans,
		tant la trobei franc’ e de bel estatge,
		humil en tot qant li vi far e dir,
	25	c’aissi m’a faich vas las autras salvatge,
		c’autra el mon non cobeit ni desir,
		mas sola lieis, c’Amors m’a faich chausir.
IV		Pero, per lieis, vuoill a totas servir,
		et esser hom et amics e comans,
	30	et lor bon pretz enanssar e grazir,
		et honorar e lauzar e mos chans —
		salva feutat lieis que a-l seignoratge,
		cui clam merce, que-l bels plazers qe-m sors
		no-m si’ estraitz, car segon bon usatge,
	35	deu om trobar merce ab las meillors,
		e lai on es plus rics pretz e valors.
V		Et es razos dels corals amadors,
		malgrat dels rics envejos mal parlans,
		q’en lor amor non segnoriu ricors,
	40	car mas us cor non a en dos amans ;
		qe fin’ amors s’egal ab lo paratge,
		e-l paratges non deu amor delir,
		tro que orguoills l’aja en poderatge ;
		mas l’us se gart vas l’autre de faillir,
	45	c’aissi-s poiran de lor amor jauzir !
VI		Bel Ses Enjans, deu drutz penre dampnatge
		cant estai be e cerca mal aillors,
		quar enaissi ho comanda Amors.
		Tornada aberrante du Ms. R
		Domna valen, riq’e de bon aire
		no-us pes s’ie-us am ses bauzia
		car esser deu se c’Amors vol qe sia.