Parducci, Amos. Miscellanea di letteratura del Medio Evo. IV. Granet, trovatore provenzale. Roma: Presso la Società, 1929

Code: 189,004 Auteur: Granet Genre: Coblas Numero: II

Pos al Comte es vengut en corage

I	1	Pos al Comte es vengut en corage
		seigner Sordel, qe per mi retrait sia
		so qe vos dos avez dit de follage,
		vos e·m Bertrans, en la tenzon partia,
	5	en dirai ver: chascus pres follamen.
		Vos q'az amor non valguest anc nien;
		en Bertrans pres prez d'armas q'en batailla
		non perdet anc per colps sos ausbercs mailla.
II		Ben sabon tut d'en Sordel son usage
	10	qe ben ama, ses iauzimen, s’amia,
		ni ia non voill qe·il vegna d’agradage
		qe·lcolg ab se, qar vergona·l penria.
		E s'anc nuls hom ab gran cors recrezen,
		flac, ni volpill, plen de nonchalemen
	15	pot aver prez d'armas, ben l'a, ses failla,
		mos compaire Bertranz ples de nuailla.
III		Per la Comtessa de Rodes valen
		an ras lor cap cavalier mais de cen;
		e s'en Sordels se vol gardar de failla,
	20	son cap raira, o ia Deus non li vailla.
IV		A·n Johan prec de Valleri breumen
		qe non creia en Bertran d'ardimen
		tro en tornei lo veia o en batailla,
		q’adoncs sabra de son bran si ben tailla.