Shepard, William P.; Chambers, Frank M.. The poems of Aimeric de Peguilhan. Evanston: Northwestern University Press, 1950

[CdT en procés d'incorporació]

Code: 010,002 Auteur: Aimeric de Peguillan Genre: Canso Numero: 2

Ades vol de l’aondansa

I	1	Ades vol de l’aondansa
		Del cor la boca parlar;
		Doncs, pus tan parli d’amar,
		Be pot creire ses duptansa
	5	Ma don’, al mieu parlamen,
		Qu’ieu am de cor finamen;
		Mas ges hieu lieys no·n creiria
		Per dig, si plus no·n fazia.
II		Quar no sap, a ma semblansa,
	10	Domna miels Amor lauzar
		Que tan pauc en vuelh’ obrar.
		Mout m’ac bella comensansa
		Ves que·m pagua de nien.
		Siey huelh m’an emblat mon sen
	15	Ab tan belha maestria
		Que·m fa plazer ma folhia.
III		Mas anc no vi fin’ amansa
		Ses alques de follejar,
		Ni joy d’amor ses pezar,
	20	Ni ses maltrag gran honransa;
		E quar al menhs d’onramen
		Ses plus son miei pessamen,
		Sueffre plus leu tota via
		L’afan doblat quascun dia.
IV	25	Et ieu dobli la balansa,
		Que·l doble tenc lieis plus car.
		Totz jorns qu’aissi sai doblar
		Doblamen ma malanansa;
		Mas assatz doblet plus gen
	30	Tristans quan bec lo pimen,
		Quar el guazanhet s’amia,
		Per so per qu’ieu pert la mia.
V		Soven mi dona pezansa,
		Ves que·m fa tart alegrar;
	35	E fora·m greu ad honrar;
		Mas l’onors e l’esperansa
		Mi tenon alques jauzen.
		Tot vuelh si’ a son talen,
		Qu’eyssamen si so seria
	40	Si tot hieu no m’o volia.
VI		Na Biatritz, no·us sabria
		Lauzar tan quo·us covenria.