Kolsen, Adolf. Beiträge zur Altprovenzalischen Lyrik (42 Erstmalig Bearbeitete Dichtungen). Firenze: Leo S.Olschki, 1939

Code: 434a,049 Auteur: Serveri de Girona Genre: Descort Numero: 6

Pus Amors vol qu'eu faça sa comanda

I	1	Pus Amors vol qu'eu faça sa comanda,
		Ben deuria Amors far mon coman ;
		Qu'eu am seleys c'Amors amar me manda,
		E prec Amor que mi amar li man,
	5	E fay o mal Merces, car lay no anda,
		Per que morray, si Deus no vol qu'y an
		A la gençor, qu'el mon se vest e·s randa,
		Ab mays de pretz e mays de beutat gran.
II		A, Flors d'abril, ab cors franc e gentil,
	10	Tot pretz fay vil, dona·l vostre c'avila ;
		Tot autre pretz, dona, faitz semblar vil !
		Vos es sela que·ls amadors afila
		D'amar, tannan tot vostre fait a fil.
III		Dona, tant es douz', avinenz e bela
	15	E tant avetz covinent cors e bel,
		Dona, tant es blanch'e fresqu'e novela
		E tant avetz cuynde cor e novel
		Qu'eu en morray, si em breu no vos ay.
		Dona, no say on m'an ne on m'estia
	20	Ne que faça ne co·m porray gandir,
		Mas lo meyllor conort, qu'eu y veyria,
		Qu'er m'auciatz, pus que·m devetz aucir ;
		Que can que can, luyn o prop, si·m morria !
		Doncs, ma dona, mays am ades morir
	25	Que si sens joy e sens amor vivia
		E sens vos, c'am mays que re e desir.
IV		Dona, no·us pusc dir ne far lo desir
		Ne·l cossir     Ne·l martir
		Ne com la noit e·l jorn per vos sospir.
	30	Pero sens dir     Podetz auzir
		E sens tir,    Per albir,     Lo martir,     Ses falir ;
		Dona, no·us pusc mays la guerra sofrir.
V		Que tout m'avetz joy e chantar e rire !
		No planc, si muyr ; mas per ço m'en azir.
	35	Can m'auretz mort, que vos ausiretz dire ?
		« Ve·us la dona, que no fa bo servir ;
		C'un seu amic aucis per gen servire,
		C'altra razo no·n pot mostrar ne dir ».
		Doncs, ma dona, no·us façatz escarnir !
VI	40	A, na Bel-vis,    A, na Clar-vis,    A, na Cors-lis
		Pus que robis    Ne' amatis,
		Domna, na Gen-asisa,
		Vuyllatz que·l cors vostre qu'es gent asis
		Teyna eu, las, una noit en camisa.
	45	Si no, dona, eu tenray mos camis
		E iray m'en, ans c'aya la mort prisa.
		Mas com n'iray, pus vos me tenetz pris ?
		Destrenhetz mi si qu'es ma mortz devisa.
		Maraveyll'er de las plus grans c'om vis,
	50	S'amar m'en pusc. Sera·y en cal que guiza ;
		Qu'i ay viscut sens cor cinc ans o sis.
		Ja no·m n'iray, si tot mortz me desfiza.
		Mas am morir que vos veyatz mas fis
		Que si sens vos me moria, na Liza.
	55	No m'es semblan qu'entres en paradis.
		Si faria, pus que per vos moris.
VII		A, n'Avinens,     A, na Plasens,
		Na Covinens    E Conoissens,
		A, don', ades eu denan vos fenis ;
	60	Pero viure volri', ab qu'en jauzis !