Kolsen, Adolf. Beiträge zur Altprovenzalischen Lyrik (42 Erstmalig Bearbeitete Dichtungen). Firenze: Leo S.Olschki, 1939

Code: 434a,008 Auteur: Serveri de Girona Genre: Alba Numero: 8

Aissi con cel c'anan erra la via

I	1	Aissi con cel c'anan erra la via
		Que deu tener, can va ab nuit escura,
		E te cami mal e brau, qui l'atura,
		E no sab loc ne cami, on se sia,
	5	Sufrens mal temps ab regart de morir
		Soy eu tan, mays no pusc, per que desir
		Que vis fenir    La nuit, començan l'ALBA.
II		Qu'el cami ay errat que far devia.
		Tan m'es la nuytz fer'e salvatg'e dura
	10	E·l temps tan braus, c'on mays vau, se piyiura,
		Per que no say on m'an ne on m'estia ;
		Qu'enan non pusc anar ne remanir
		Ne pusc lo temps laxar ne·l pusc sofrir,
		Per que m'albir     Que m'an trop tardan l'ALBA.
III	15	Est segles fals es la nuitz que m'aguia
		Cami d'infern temps braus, ples de rancura
		E vals de plors, ço ditz sant'escriptura,
		E l'enfans paucs, can nays, o signifia ;
		C'ab dolors uc' e·y esta ez exir
	20	No·n pot ses plor. Ver Deu, faitz m'esclarzir
		Per dreyt seguir     Lo cami denan l'ALBA.
IV		Eu no say ges cel qui va a s'amia
		De nuyt; car cil, cuy m'autrey, m'asegura
		Pessan a leys, e d'altre no n'ay cura
	25	E lays la nuyt e voil pendre·l clar dia,
		Car il no tem lanceiar ne maldir ;
		Enans li pusc ab jorn denan venir,
		Per qu'eu asir    La nuit, desiran l'ALBA.
V		Altr'amador say, c'a ir'e feunia,
	30	Can ab sidons es en destreg e jura,
		Can lo jorns ve e la nuytz tan pauc dura,
		E ja mays jor ne alba no volria
		Ez encar tan dura la nuytz ! Cossir
		C'ab nuit no pusc de leys, cuy soy, jausir
	35	Ne·l lum chausir,     Que·ns fa clar'e gran l'ALBA.
VI		Gaugs es la lutz d'estella qu'el mon guia,
		E anc no fo domna d'aytal natura
		C'on mays sofre de preyadors, melura
		E sos espos fa ço que no faria
	40	Nuylls altres, pos, car platz li, tan servir
		Ve s'espoça, amar e obezir
		Que, ses falir,     Que·ns va·l jorns, mostra·n l'ALBA.
VII		D'est'alba deu totz hom aver desir ;
		C'om ses l'alba no pot al jorn venir
	45	Ne·l sol chausir     Ne deu azirar l'ALBA !
VIII		Lo nobles reys de Mayllorca sab dir
		E far tot be ; e·l segles deu servir
		E obezir,     Serven e honran l'ALBA.