Kolsen, Adolf. Beiträge zur Altprovenzalischen Lyrik (42 Erstmalig Bearbeitete Dichtungen). Firenze: Leo S.Olschki, 1939

Code: 434a,023 Auteur: Serveri de Girona Genre: Sirventes Numero: 10

Eras veyretz motz sotils, prims e cars

I	1	Eras veyretz     Motz sotils, prims e cars
		E leus e plas e per entendre clars
		E manta greu rima richa
		Contrals totz croys, ples d'enjan,
	5	Qui meton pretz en soan
		C'anc valors entr'els no sec
		Per c'oymais, pus soy salners,
		Lor seray braus e guerrers.
II		Can ausiretz     Los noms dels plus amars,
	10	D'estor enan, si doncs mos acuyndars
		E la razos denan ditcha
		No·ls chasti'al mens d'aytan
		C'una vetz digon ver l'an ;
		Mas tan son malvat e sec
	15	E mençonger e revers
		Qu'entr'els no cap vertaders.
III		Mas que·m diretz ? Valra·ls mos chastiars,
		Pus a mi notz tan que·l solatz e·l dars
		N'es mens ? No, qu'enjans los tricha.
	20	Doncs no diray ço que fan ?
		Hoc be, e plus que faran ;
		Car Deus fe be ço que dec ;
		C'a cascun dels mençongers
		Fe mays de tretze parlers.
IV	25	Doncs pus te letz,     Los noms dels croys avars
		Diras ? — Hoc. — Que·ls cels, remanra·l parlars ? —
		Non ja ; qu'en paraul'esdicha
		No preson re li presan ! —
		Si fan, pus y veson dan ;
	30	Mar fas eu ? Qui·t ditz : « M'y ec ? »
		No·t gardaras dels envers,
		No ? — Si faz. Entr'els qu'y quers ?
V		Ja no·m faretz     Calar los vils affars ;
		C'a celuy platz, cuy platz cortz e chantars
	35	E per cuy es valors ritcha,
		Al noble Peyre, l'enfan,
		Cuy Deus a dat de sen tan,
		Can tortz ab luy no parec,
		E par onestz cavalers ;
	40	Que francs es e drechurers.
VI		Si·l vezcomt, c'oy pretz abricha,
		Lauzi oymay, tuit diran
		Que per so·l lau, car val tan
		E car totz temps fe can dec
	45	E per ço, car soy salners
		E car non soy mençongers.
VII		Sobrepretz, ab pretz enters
		Avetz ab tot laus avers !