Kolsen, Adolf. Beiträge zur Altprovenzalischen Lyrik (42 Erstmalig Bearbeitete Dichtungen). Firenze: Leo S.Olschki, 1939

Code: 167,030 Auteur: Gaucelm Faidit Genre: Canso Numero: 21

Ja mais nulh temps no·m pot re far Amors

I	1	Ja mais nulh temps no·m pot re far Amors
		Que·m sia greu, ni maltraigz ni afans ;
		Qu'era m'a fag tant avinent socors
		Que las perdas mi restaura e·ls dans,
	5	Qu'avia pres a dreg per mo folatge,
		E si anc jorn mi fetz en re marrir,
		Er li perdo lo destric e·l dampnatge ;
		Qu'a tal dona fa mos precx acoilhir
		Don m'esmenda tot quant m'a fag sofrir.
	10	Mout mi saup gen lo cor d'autras partir
		Et ajostar en lieys totz mos talans
		Amors lo jorn que·m fetz doptan venir
		Ves la belha, don us cortes semblans
		Dels sieus belhs huelhs m'intret inz el coratge
	15	Si que anc pueys no·m puec virar alhors.
		Adonc saup ieu que l'huelh m'eran messatge
		D'amor ; c'al cor m'en ve freigz e calors,
		Joys e cossirs, ardimens e paors !
III		Aquel esglais et aquelha dousors
	20	M'afinet si mon cor, ses totz engans,
		Qu'anc pueys vezers d'autra no·m fo sabors
		Ni tot quant ieu avia vist enans.
		Tan la trobei franch'e de belh estatge,
		Humil en tot quan li vi far ni dir
	25	Qu'aissi m'a faich de las autras salvatge
		Qu'una del mon non cobeit ni desir
		Mas sola lieys qu'Amors m'a faich cauzir.
IV		Pero per lieys vuelh a totas servir
		Et esser hom et amics e comans
	30	E lor bon pretz enansar e grazir
		Et honorar e lauzar en mos chans,
		Sal la feutat, lieys que a·l seignoratge,
		Cui clam merce que·l belhs plazers, que·m sors,
		No·m si'estraitz ; quar segon bon usatge
	35	Deu hom trobar merce ab las melhors
		E lai on es plus rix pretz e valors.
V		Et es razos dels corals amadors,
		Mal grat dels rics enveyos, malparlans,
		Qu'en lor amor no senhorei ricors,
	40	Quant us cors es entre dos fis amans.
		Que fin'amors s'egal'ab lo paratge
		E·l paratges non deu amor delir
		Ni·s tanh c'orguelhs hi aia poderatge.
		Mas l'us s'i gart vas l'autre de faillir ;
	45	Qu'aissi·s poiran de lor amor jauzir.
VI		Per sos enjans deu drutz penre dampnatge,
		Quant l’estai ben e pueis quer mal alhors ;
		Quar enaissi o comanda Amors.