Kolsen, Adolf. Beiträge zur Altprovenzalischen Lyrik (42 Erstmalig Bearbeitete Dichtungen). Firenze: Leo S.Olschki, 1939

Code: 167,056 Auteur: Gaucelm Faidit Genre: Canso Numero: 22

S'om pogues partir son voler

I	1	S'om pogues partir son voler
		De so don plus a·l cor volon,
		Can nom pot jauzimen vezer,
		Us dels grans sens fora del mon.
	5	Car de las grans foudatz, qu'i son,
		Es be la maier, qui s'enten
		En son dan segr'ad escien ;
		Car doblamen     Fai fallimen.
		Pero greu er fis amics drutz privatz,
	10	Si·l bes e·l mals e·l jois e·l dans no·il platz.
II		Tot aisso mi vengr'a plazer,
		Si ben sui el maltraich prion,
		S'Amors mi volgues tant valer
		Que l'amoros cor desiron
	15	Mi pagues d'un joi jauzion.
		C'assatz crei que for'avinen
		Qes agues del ben qui·l mal sen
		Q'ie·n preira cen     Maltraichs sofren.
		E fora·m jois e plazers mout onratz,
	20	S'apres cen mals en fos d'un ben pagatz.
III		Mas ieu o pert, si·l ben esper,
		Cum cel q'al jogar se cofon,
		Que jog'e no·n pot joc aver
		Ni non sent fam ni frech ni son.
	25	Atresi m'es poiat el fron
		Et intrat el cor follamen
		C'om plus i pert, plus m'i aten
		Cobrar soven ;    Tant ai fol sen.
		E l'atendres non es res mas foudatz ;
	30	Car a mon dan sui trop enamoratz !
IV		Tuich trop son-mal ; q'eu·l sai en ver
		Qe·l trop poiars, don chascus gron,
		Q'ieu fezi, m'a faich bas chazer,
		E pero poiei tant amon
	35	Qe penre cuidei l'aurion,
		C’om non pot penr' ab ren viven ;
		De tant fort manieira·s defen.
		Pero temen     Et humilmen
		O comencei com hom d'amor forssatz,
	40	Don no mer mal, si n'er'a dreig jutgatz.
V		E car res no·m pot pro tener
		Ab lieis, don muor et art e fon,
		Un sen fauc c'ab forsat poder
		Fug de lieis vezer e·m rescon.
	45	Mas mos sens no vei que m'aon,
		Q'ieu muor, qand no vei son cors gen,
		E qand lo vei, muor eissamen ;
		Car nuill parven      No·m fai plazen,
		Anz, qand l'esgart, esgarda d'altre latz
	50	E no m'acuoill ni-m vol aver solatz.
VI		Vas midonz sui, de franc saber,
		Plus humils dels frairs de Granmon,
		Et ill m'es d'orgoillos parer
		Si que, qan la prec, no·m respon.
	55	Un'aventur'ai, no sai don,
		C'anc re non amei coralmen,
		C'orguoill no·m mostres mantenen,
		E tal tormen     Fer e cozen
		Me don'Amors, car eu li·m sui donatz ;
	60	Aqest m'es totz lo guizerdens e·l gratz !
VII		Si be·m sui en greu pessamen
		Cum cel que merce non aten,
		Chanssos, vai t'en,     Tost e corren,
		Dir mon Thesaur, de cui es Monferratz,
	65	Q'ieu·l qier perdon, car lai non sui tornatz.
VIII		Bels-Diamans, be·m plai vostra beutatz
		E ben lo pretz, on chascun jorn poiatz !