Oroz Arizcuren, Francisco J. La lírica religiosa en la literatura provenzal antigua. Pamplona: Excma. Diputación Foral de Navarra - Institución Príncipe de Viana, 1972.

Edición crítica, traducción, notas y glosario. Versión revisada para Corpus des Troubadours, 2011.

Code: 159,001 Auteur: Fraire Menor Genre: Chanson religieuse, Preghiera Numero: XVI

Cor ay e voluntatz

I		Cor ay e voluntatz
		que fass’us precx prezatz,
		s’ieu ben far los sabia;
		e volgra·m fos donatz
	5	sens e sabers assatz,
		sels qu’als precx convenria,
		que voler pro n’auria.
		Dona sancta Maria,
		preyatz Ihesus, si·us platz,
	10	que es Cristz apellatz
		e de paradis via,
		qu’ampar l’anima mia
		si cum plazers li sia,
		que·m perdon mos peccatz
	15	qu’ai pessan cogitatz
		e ditz per ma folia,
		sels qu’ai obratz man dia
		aissi quo non devia,
		don so mot encolpatz;
	20	dona de dignetatz,
		vos me·n faitz guerentia.
II		Enquer prec que·m valhatz,
		dona, e que·m sofratz
		qu’ieu vos laus tota via.
	25	Pero crey qu’es vertatz
		que si·l sen dels prelatz
		e·l saber de clercia
		hom aiustar podia,
		e ieu poder avia
	30	qu’en mi fos ajustatz,
		non seria bastatz,
		ni·l mile non auria
		del saber qu’obs m’auria
		al laus qu’ieu dir volria,
	35	dona,‘ls bes que son datz
		en vos qu’enlumenatz
		tot lo mon que·s perdia;
		per vos se salv’e·s guia,
		per qu’ieu dic sens fadia:
	40	per vos son restauratz,
		dona,·ls que son salvatz;
		aidatz me qu’ieu sals sia.
III		Qu’ieu crey, si vos m’aidatz
		ni mos precx escoutatz
	45	—tant etz de Dieu amia—
		leu sera acabatz
		mos precx et yssaussatz,
		mielhs que no·m tanheria
		segon que yeu fallia
	50	el temps que mal vivia.
		Pero suy m’en laissatz,
		don prec merce m’aiatz,
		qu’estiers non pujaria
		a la gran companhia
	55	on es tot’alegria
		de Dieu qu’es trinitatz,
		ni veiria sa fatz
		si merces no·m valia.
		O maire de Dieu pia,
	60	no truep en voz fadia!
		Sivals aitan m’aidatz
		—quan que sia passatz—
		qu’ieu pres dels sayns estia.