Kolsen, Adolf. Beiträge zur Altprovenzalischen Lyrik (42 Erstmalig Bearbeitete Dichtungen). Firenze: Leo S.Olschki, 1939

Code: 406,009 Auteur: Raimon de Miraval Genre: Canso Numero: 23

Era m'agr'ops que m'aizis

I	1	Era m'agr'ops que m'aizis
		De tal chanson qe·m grazis
		La bella per cui soi gais ;
		Car no·n cuig ja nuills hom mais
	5	Sia d'adreit'entendenssa.
		Tant los vei totz enujos
		C'apenas en conosc dos
		Vas Joi ses cal que faillenssa.
II		Neis cels qu'ieu tengra per fis
	10	Trob lausengiers e devis
		E poignon c'amors abais,
		Don dompnas an tals esglais
		Qe de veraia temenssa
		Laisson mains faitz bels e bos,
	15	Que lor for'honors e pros,
		Si jois trobes mantenenssa.
III		E·n vauc enbroncs et enclis,
		C'ades tem de mos vezis
		Qe·n digan so don m'irais ;
	20	C'aissi·m venon tot d'eslais
		Dire ma greu malsabenssa
		E son m'en tant envios
		C'ab pauc m'agron fait gelos,
		Si no·m sobres conoissensa.
IV	25	Puois membra·m cum s'afortis
		Dompna, cui bos pretz noiris,
		Lai on plus li sortz esmais.
		Ab sol q'ella no·s biais
		De sa bona chaptenenssa,
	30	No·l pot dampnar fals ressos ;
		C'apres ve·il bona razos
		Et es dreitz que·l vers o venssa.
V		Dompnas an lor dan enquis ;
		Qe l'una l'autr'escarnis,
	35	Que de mains janglars savais
		Rizon e fan col e cais.
		Mas pauc val, a ma parvenssa,
		Solatz q' es d'avols sermos,
		Si de plazers amoros
	40	Non fenis e non comenssa.
VI		Amiga, per cui languis,
		Per vos muor, e si·m gueris,
		Totz temps vos serai verais
		Qe·l bes e l'onors e·l jais
	45	E·l sabers e la sciensa,
		Q'ieu ai, m'aven tot per vos,
		E s'enquer de mielhs i fos,
		Vostra fora ma valenssa !
VII		Mais d'amic, ma conoissensa
	50	Toilla·m Dieus, si·m part de vos
		Miraval ni mas chansos ;
		Que·l vostre tortz vuoill qe·m venssa.
VIII		Mantels, vostra beutatz gensa
		E vostre pretz es tant bos
	55	Que dels malvatz e dels pros
		N'avetz laus e benvolenssa.
IX		Pastoretz, gran malvolenssa
		Avetz de mainz rics baros,
		Car los faitz totz estar jos
	60	E poiaz vostra valenssa.