Kolsen, Adolf. Beiträge zur Altprovenzalischen Lyrik (42 Erstmalig Bearbeitete Dichtungen). Firenze: Leo S.Olschki, 1939

Code: 406,015a Auteur: Raimon de Miraval Genre: Canso Numero: 24

Ben sai que per aventura

I	1	Ben sai que per aventura
		M'es venguda·il razos q'ieu ai ;
		Que chans d'auzel ni verdura
		Ni flors d'abril ni ros de mai
	5	No m'agr'ogan tornat en jai,
		Si d'amor, que tot'ira vens,
		No·m vengues alcus gauzimens,
		Per que·il dei tot mon joi grazir.
II		Tot lo maltraich e l'endura
	10	E·l lonc desirier e l'esmai
		Conosc qu' eras m' adrechura
		Cill que m' a donat maint esglai.
		Que val amors, s'om mal no·n trai ?
		Que la jelosi'e·l turmens,
	15	Q' ieu n' aic, e l'angoissos talens
		Mi fant doblamen esgauzir.
III		Drutz, qui sovens se rancura
		Ni tot enquer cant sidonz fai,
		Si conquier amor, no·il dura ;
	20	Quar non sap co·s ve ni co·s vai ;
		Que dompna promet et estrai
		E ditz mainz plazers avinens
		Per so q' entre las bonas gens
		Vuoill' om totz sos pretz enantir.
IV	25	S' autr' entendeire s' atura,
		Preian midonz que l'arn n·l bai,
		Tort i fai e desmesura,
		Mentre que de m' amor s'apai
		Qu'il en fai lo, so que s'eschai,
	30	Don ieu li rend merces cinc cens,
		E pois mieus es totz l'onramens,
		Cui cal, si·l fols s'i vol aunir ?
V		A totz jorns creis e meillura
		E si val tant que non pot mai
	35	La bella que m' asegura
		De s'amor, or no·n faillirai.
		Lonc temps m' a tengut en assai
		E s'ieu crezes sos malvolens
		Per so qu'eras sai q'es niens,
	40	Be·m pogr' a tort de liei partir !
VI		Domn', ieu sui d'aital natura
		Q' en la sazon, on mieills m'estrai,
		Sui ves tota creatura
		Plus francs, e ves vos o serai ;
	45	C'on plus mi tenretz coind'e gai,
		Vos puosc far mil vers sagramens
		Q'ie·us serai plus obediens
		E·us en vobrai mil tans servir !
VII		Mais d'amic, pretz vos es e sens,
	50	Si voletz mos enantimens ;
		C'anc Miravals no·us volc faillir.
VIII		Mantel, qui partis engalmens
		Vostres adreitz chaptenemens,
		Cent domnas en pogra garnir !
IX	55	Pastoret, vostres malvolens,
		On que sion, vuoill far sabens
		Q'ieu non am ren que vos azir !