Javascript DHTML Drop Down Menu Powered by dhtml-menu-builder.comJavascript DHTML Drop Down Menu Powered by dhtml-menu-builder.comJavascript DHTML Drop Down Menu Powered by dhtml-menu-builder.com

* Introduction
* Vocabulaire

* Présentation
* Appareil critique
* Notes
* Traductions

Kolsen, Adolf. Beiträge zur Altprovenzalischen Lyrik (42 Erstmalig Bearbeitete Dichtungen). Firenze: Leo S.Olschki, 1939

Code: 406,018 Auteur: Raimon de Miraval Genre: Canso Numero: 25

Selh cui joys tanh ni chantar sap

I 1 Selh cui joys tanh ni chantar sap
    E sos belhs ditz vol despendre,
    A tal dona·ls fass'entendre
    Don si' onratz lo dans e·l pros ;
  5 Qu'assatz deu valer cortes nos
    Dezavinen drudairia,
    E s'ieu domnei a fadia,
    Sivals ades enquier en luec gentil.
     
II   Leial domna franch'ez umil
  10 Vuelh mais servir et atendre
    Que d'autra guizardon prendre,
    Cui soven agues ops perdos.
    Aital, ses bruig e ses tensos,
    Gaia, de belha paria,
  15 Corteza, ses vilania
    Ai chauzida, ses feinta e ses gap.
     
III   E si tot ab lieys non acap
    Lo joy que·m fa·l cor ensendre,
    Per so no n'es mos gauchz mendre,
  20 Pos de mi no·n mou l'ochaizos
    Qu'ieu no·m n'azir ni·n sui clamos.
    Mas qui'ls dreitz d'amor seguia,
    Ben sai que razos seria,
    S'ieu la tenc car, qu'elha no·m tengues vil.
     
IV 25 Plazer li deu, quar entre mil
    Donas vuelc a sa cort tendre,
    E si·m laissa mais dessendre,
    Non parra sos captenhs tan bos !
    Que ja·n van dizen a rescos
  30 Qu'ieu non sec la dreita via ;
    Mas per ditz d'autrui que sia
    Non puesc creire qu'en lieys m'amors mescap.
     
V   S'ieu de midons aic ren d'arap,
    No·il voill tort ni dreg contendre,
  35 C’adobatz li sui del rendre
    Mas juntas e de genolhos.
    Pero si·l plagues que fos dos,
    Mout feira gran cortezia,
    E s'a lieys non platz, estia
  40 Qu'eu·n sui batutz plus fort c'ab un vergil.
     
VI   Menar me pot ab un prim fil
    Qu'ieu no·m vuoill a lieys defendre
    E·l sieu mezeis tort car vendre,
    Si tot m'en era poderos.
  45 Que tan sui sieus, per qu'es razos
    Que, s'il ja de ren falhia,
    Que·il colpa deu esser mia
    Et es ben dreg que·m torne sus el cap.
     
VII   Dona, Bezers ni Aragos
  50 Ad ops d'amar no·us valria
    Tan cum Miravalhs faria,
    Si franchamen tenetz guarnit lo cap.
     
VIII   Si·m vol mal neguns dels baros
    Per mon Audiart, lor sia !
  55 Que ja de sa senhoria
    No·m partirai nuill temps ni de son trap.
     
IX   Quar es tan sos pretz cars e bos,
    Ab n'Alazais vuelh paria
    E serai sieus tota via
  60 Apres selba que no vol qu'om en gap.

 

 

Institut d'Estudis Catalans. Carrer del Carme 47. 08001 Barcelona.
Telèfon +34 932 701 620. Fax +34 932 701 180. informacio@iec.cat - Informació legal

UAI