Kolsen, Adolf. Beiträge zur Altprovenzalischen Lyrik (42 Erstmalig Bearbeitete Dichtungen). Firenze: Leo S.Olschki, 1939

Code: 406,019 Auteur: Raimon de Miraval Genre: Canso Numero: 26

Cel qi de chantar s'entremet

I	1	Cel qi de chantar s'entremet,
		Si d'avinen o sap faire,
		Non s'en deu ges pueis estraire
		Per amor ni per nuls afars ;
	5	Q'aitals usans'es benestars.
		Qe piegz o fai totz om, qe s'en estraia,
		Pus o comenz, qe cel qe no·s n'esaia.
II		E car ma domna no·m tramet
		Salutz ni ren don m'esclaire
	10	Ni vol qe ves leis repaire,
		No·m pot gair'abeillir chantars,
		Qe, s'eu fos alegres ni clars,
		A cascun jorn saubra far chanzon gaia
		Del ben qe·il voil et de lauzor veraia.
III	15	Si m'a tengut en essaget
		Per saber si·l sui trichaire,
		Ges per tant ves leis no·m vaire,
		Anz conois q'eu li sui plus cars ;
		C'aissi·s taing a dona gardars
	20	Qu'esaiar deu segon ; on menhs s'apaia
		Ab quels destrics, li ment pois qant s'eschaia.
IV		Per zo no·m voil qe ja m'abet
		Lauzengiers ni malparlaire
		Qe lunz autre donpneiaire
	25	De s'amor me puesc'esser pars.
		E pois enseigna·m dompneiars
		Qe prend'em patz tot qant a midons plaia ;
		Car fols es drutz qi per totz dans s'esmaia.
V		Dieus cofonda l'anel el det
	30	Ab qe la·m cuiet forstraire
		Cel q'en remas galiaire,
		E vos, domna, cui es l'esgars,
		Voillatz qe·l meus humils preiars
		Me fass'ab vos venir en luec que jaia
	35	Si con fai drutz qi ten sidonz e baia.
VI		Qar, fe q'eu deg mon Pastoret,
		No·m seri'estiers veiaire
		Que zo pogues sofrir gaire ;
		Qe·l fuecs d'amor s'es tant espars
	40	En mi c'a pauc no·m sui totz ars,
		E si per vos, amiga, no·s balaia,
		Non es dompna qi ja del cor lo·m traia.
VII		Mantels, non es de presset ni de saia,
		Mas de valor e de beutat veraia !
VIII	45	Mon Audiart sal Dieus e sa cort gaia ;
		Q'el manten pretz totztemps, qi qe·l dechaia.