Oroz Arizcuren, Francisco J. La lírica religiosa en la literatura provenzal antigua. Pamplona: Excma. Diputación Foral de Navarra - Institución Príncipe de Viana, 1972.

Edición crítica, traducción, notas y glosario. Versión revisada para Corpus des Troubadours, 2011.

Code: 156,015 Auteur: Falquet de Romans Genre: Alba religieuse Numero: XV

Vers Dieus, el vostre nom e de sancta Maria

I	1	Vers Dieus, el vostre nom e de sancta Maria
		m’esvelharai hueimajs, pus l’estela del dia
	3	ven daus Ierusalem, que m’essenha qu’ieu dia:
		Estaitz sus e velhatz,
		senhor que Dieus amatz!
	6	Que·l iorns es aprosmatz
		e la nuech ten sa via;
		e sia·n Dieus lauzatz
	9	per nos et adoratz,
		e·l preguem que·ns don patz
		a tota nostra via.
	12	La nuech vaj e·l iorns ve
		ab clar cel e sere,
		e l’alba no·s rete,
	15	ans ve belh’e complia.
II		Senher Dieus que nasquetz de la verge Maria
		per nos guerir de mort e per restaurar via
	18	e per destruir efern que·l dïables tenia,
		e fos en crotz levatz
		d’espinas coronatz,
	21	e de fel abeuratz:
		senher, merce vos cria
		aquest pobles onratz,
	24	que·l vostra pïetatz
		lor perdon lor peccatz.
		Amen, Dieus, aissi sia.
	27	La nuech vay e·l iorns ve
		ab clar cel e sere,
		e l’alba no·s rete,
	30	ans ve belh’e complia.
III		Qui no sap Dieu prejar ops es que o aprenda
		et auja qu’ieu diraj et escout et entenda:
	33	Dieus, que comensamens es de tota fazenda,
		laus vos ren a merce
		[de l’honor] e del be
	36	que m’avetz fag ancse;
		e prec, senher, que·us prenda
		grans pïetatz de me,
	39	que no·m truep ni·m malme
		ni m’engane de re
		dïables ni·m surprenda.
	42	La nuech vai e·l  iorns ve
		ab clar cel e sere,
		e l’alba no·s rete,
	45	ans ve belh’e complia.
IV		Dieus, donatz me saber e sen ab qu’ieu aprenda
		vostres sanhs mandamens e·ls auja e·ls entenda,
	48	e·l vostra pïetatz que·m guerisc’e·m defenda
		en est segle terre,
		que no·m trabuc ab se;
	51	quar ie·us ador e·us cre,
		senher, e·us fauc ufrenda
		de me e de ma fe,
	54	qu’aissi·s tanh e·s cove;
		per so vos crit merce
		e de mos tortz esmenda.
	57	La nuech vai e·l iorns ve
		ab clar cel e sere,
		e l’alba no·s rete,
	60	ans ve belh’e complia.
V		Aquel glorïos Dieus, que son cors det a venda
		per totz nos a salvar, prec qu’entre nos estenda
	63	lo sieu Sant Esperit que de mal nos defenda,
		e d’aitan nos estre
		iosta los sieus nos me
	66	laissus on si capte,
		e·ns meta dins sa tenda.
		La nuech vai e·l iorns ve
	69	ab clar cel e sere,
		e l’alba no·s rete,
		ans ve belh’e complia.