Kolsen, Adolf. Beiträge zur Altprovenzalischen Lyrik (42 Erstmalig Bearbeitete Dichtungen). Firenze: Leo S.Olschki, 1939

Code: 409,001 Auteur: Raimon de las Salas Genre: Canso Numero: 33

Ancse m'avetz tengut a nonchaler

I	1	Ancse m'avetz tengut a nonchaler
		On meillz vos sai de bon talan servir.
		Adonc veirai s'ab mal m'en pose jauzir,
		Amors, pos bes no m'en pot pro tener,
	5	E deu esser, so mi par, per razo,
		Qe, s'ieu faz mal, n'aia bon guizerdo,
		Pos per be-faitz mi rendetz mal ancse,
		Ez er pechatz, s'al vostre tort m'ave.
II		E poriatz m'ab pauc be retenir ;
	10	Mas vos no·n cal, per q'eu vas vos m'azir.
		Pero trop faill, qui fai autrui faillir
		Son escien, desqe l'a en poder.
		Mas eu faill plus, qar ab vos mou tenzo,
		E no·us cugez qe vostr'oc torn en no,
	15	Amors ! Anz voill, s'anc jorn vos hai dit re,
		Qems sia greu? Ve·us m'a vostra merce !
III		E si merces no·m pot ab vos valer,
		Sera pechatz, puois tan voill obezir
		Vostres comanz, e si·m volez aucir,
	20	No·us mi defen e faz o ben parer ;
		Qe merceian vos veing qerre perdo
		Del vostre tort. Gardatz doncs s'anc mais fo
		Hom qez ames ab tan de bona fe ;
		Qe·us qier perdon del tort q'avez de me !