Kolsen, Adolf. Beiträge zur Altprovenzalischen Lyrik (42 Erstmalig Bearbeitete Dichtungen). Firenze: Leo S.Olschki, 1939

Code: 406,036 Auteur: Raimon de Miraval Genre: Canso Numero: 29

Res contr'Amor non es guirens

I		Res contr'Amor non es guirens
		Lai on sos poders s'atura ;
		Que no vol autra mesura
		Mas c'om sega totz sos talens ;
	5	C'aitals es sos seynorius !
		E quals que s'en fass'esquius,
		A sa merce l'es obs venir,
		Si doncs no·s vol d'amor gequir.
II		Per qu'es als malvatz espavens
	10	Seguir d'amor l'aventura,
		E qui de bon pretz a cura,
		Per domneiar es pus valens
		E pus francs e pus autius
		E·n vol hom nomenatius
	15	Esser de dar e de servir
		E d'ardimen e de garnir.
III		Qu'ieu n'aurai estat lonjamens
		Leyals amics, ses falsura
		Per tal qui·m desassegura
	20	Hon pus li son obediens
		E, si tot m'en fein braidius,
		Il conoix be que ja vius
		No·m poiria de leis partir
		Per dan que·m n'avein'a sofrir.
IV	25	Tant m'es lo contraditz cozens
		C'a pauc no muer de rancura ;
		Mas tan n'ai fach long'endura
		Que mais no s'i tain venjamens
		Mas ab bels ditz agradius,
	30	E ja negus mals mesclius
		Non dira tan que ja·m n'aïr
		Ni·n tolla·ls bes que n'ai fait dir.
V		Bela domna, doussa, plasens,
		Franc' e de gentil natura,
	35	Gencer d'autra criatura,
		Prenda vos de me chausimens ;
		Que·l cor m'art corn us calius
		E son plus glassatz que rius
		E no·m fazatz aman languir,
	40	Pus del tot no·m voletz ausir !
VI		Era, mentre que·l tems es gens
		E la fuelha fresca dura,
		Ans que repaire·l freidura,
		Me n'agr'ops cals que jauzimens ;
	45	Que d'amor va leu sos brius,
		E pus hom pas' us estius
		Ses pagamens o ses jausir,
		Tot lo pot lausengiers delir !