Kolsen, Adolf. Beiträge zur Altprovenzalischen Lyrik (42 Erstmalig Bearbeitete Dichtungen). Firenze: Leo S.Olschki, 1939

Code: 406,037 Auteur: Raimon de Miraval Genre: Canso Numero: 30

S'a dreg fos chantars grazitz

I		S'a dreg fos chantars grazitz,
		Ben chantera pus soven ;
		Mas veiair' es a la gen
		Que totz trobars si'enguals,
	5	Per qu'ieu no·i seria sals —
		Qu'ieu vuelh grat de las melhors, —
		S’entrels desconoissedors
		E domnes de mals talans
		Sovendejava mos chans.
	10	Qu’ieu sai so que quasqus ditz
II		Al plus celat parlamen.
		Quan per lur descauzimen
		Fan creir’a domnes manhs mals
		E donan los cosselhs fals
	15	Que no sofran trobadors
		So don gen se sierv amors;
		Que selhui tanh mielhs demans
		Que mais a d’aips benestants.
III		S’es larcs, cortes et arditz
	20	E sap servir d'avinen.
		Sos chans quals dona·l defen?
		Vers es que trobars ses als
		Non es proeza cabals
		Ni sol us mestiers valors ;
	25	Pero corteza lauzors,
		Bendigz et onratz bobans
		Es de totz bos pretz enans.
IV		D'aisso·m tenh per enrequitz
		Quar la belh' en cuy m'enten
	30	Conoys qui·lh ditz ver o·lh men,
		Per que·l sui del tot leyals ;
		Qu'amicx leugiers ni venals
		Non pren d'onrat luec secors.
		Doncs pus tan me platz l'onors,
	35	Em patz dey suffrir los dans ;
		Que·l pros m'en sembla plus grans.
V		Si·m fas ieu qu’als pus falhitz
		Son de belh captenemen
		E·n parli essenhamen
	40	A mos enemicx mortals
		Q’a penes conoisso quals
		De lor eu tenc per peiors,
		E non es tan greus dolors
		A drut ni pus durs afans
	45	Q’onrar lauzengiers truans.
VI		Domna, vos m’etz de tot guitz;
		Qu’ieu non ai foldat ni sen.
		Mas al vostre mandamen
		Tan m’es lo dezirs corals
	50	Q’us ans me sembla jornals.
		Si·m fai loncs atens pares
		E si·m par mos chans folhors;
		Qu’en domney ses totz enguans
		Es greus termes de tres ans.
VII	55	Mielhs d’amor, d’autras ricors,
		Que·us semblarian majors.
		Vos val Miravalhs dos tans ;
		Quar l'avetz ses totz engans.
VIII		N'Audiartz, totas valors
	60	Daura domneys et amors
		E neus segra·us mals balans.
		Pus a vos platz qu'es enans.