Stronski, Stanislaw. Le troubadour Folquet de Marseille. Genève: Slatkine Reprints, 1968

[CdT en procés d'incorporació]

Code: 155,005 Auteur: Folquet de Marseilla Genre: Canso Numero: I

Ben an mort mi e lor

I	1	Ben an mort mi e lor
		mei huel galiador,
		per que·s tanh qu’ab els plor,
		pos ylh so an merit,
	5	qu’en tal don’an chausit
		dont han fach fallimen,
		e qui n’aut pueia bas deissen ;
		pero, en sa merce m’aten,
		car ieu no cre que merces aus faillir
	10	lai on Dieus volc totz autres bes assir.
II		E si, conosc d’Amor
		que mos dans li’a sabor,
		que so don ai largor
		mi fai prezar petit
	15	e ponhar ad estrit,
		en tal que si·m defen :
		so que m’eneaussa vau fugen
		e so que·m fugh ieu vau seguen ;
		d’aisso no sai cossi·m posca garir
	20	qu’ensems m’aven encaussar e fugir.
III		Ar aujatz gran folhor :
		qu’arditz sui per paor,
		mas tan tem la dolor
		d’amor que m’a saizit
	25	qu’aisso·m fai plus ardit
		de mostrar mon talen
		a lieis que·m fai vellar durmen ;
		doncs, ai per paor ardimen,
		aissi com sel qu’estiers no pot gandir
	30	que vai totz sols entre eine cens ferir.
IV		Pros dona cui ador,
		restauratz en valor
		mi e vostra lausor !
		qu’amdui n’em afreulit
	35	car metetz en oblit
		mi que·us am finamen ;
		que cylh qu’o sabon van dizen
		que croi servir fai manta gen,
		et eu que·us am tan que d’als non cossir
	40	pert mi e vos : gardatz si·m dei marrir !
V		Eu oc ! c’ogan per flor
		no·m viratz chantador,
		mas prec de mo seinhor
		lo bon rei, cui Dieus guit,
	45	d’Arago, m’an partit
		d’ir’ e de marrimen ;
		e si, chan tot forsadamen,
		mas al sieu plazen mandamen
		no devon ges sei amic contradir,
	50	qu’als enemix vem que·s fai obezir.
T1		Sai, a la dolor de la den
		vir la leng’, a lieis cui mi ren,
		et er merces s’ill me denh’ aculhir,
		qu’en maint bon loc faz son ric pretz auzir.
T2	55	Marsan, vas Trez vai t’en corren,
		lai a·N Raimon Berengier cui desir,
		e car li’er bo, fatz li mon chan auzir.
T3		Bels N’Azimans, Dieus mi gart de falhir
		vas lieis que faill vas mi, s’o auzes dir.