Stronski, Stanislaw. Le troubadour Folquet de Marseille. Genève: Slatkine Reprints, 1968

[CdT en procés d'incorporació]

Code: 155,027 Auteur: Folquet de Marseilla Genre: Canso Numero: IV

Us volers outracujatz

I	1	Us volers outracujatz
		s’es ins e mon cor aders,
		pero no·m ditz mos espers
		ja puesc’ esser acabatz :
	5	tant aut s’es empens ;
		ni no m’autreya mos sens
		qu’ieu-n sia desesperatz ;
		e sui aissi meitadatz :
		que no·m desesper
	10	ni aus esperans’ aver.
II		Car tant mi sont aut poiatz
		vas qu’es petitz mos poders
		per que·m chastia temers,
		car aitals ardimens fatz
	15	notz a mantas gens ;
		mas d’un conort sui jauzens
		que·m saill deves l’autre latz
		e mostra·m q’umilitaz
		l’a tant en poder
	20	que bes m’ en pot eschazer.
III		Tant s’i es mos cors fermatz
		que·l mensonja·m sembla vers :
		qu’aitals maltraitz m’es lezers ;
		pero si, sai qu’es vertatz,
	25	que bos aturs vens ;
		per qu’ie·us prec, dona valens,
		que sol d’aitan mi suffratz —
		e puois serai gen pagatz —
		que-m laissetz voler
	30	lo gaug qu’ieu desir vezer.
IV		Be·m parec necietatz
		e trop sobrarditz volers
		quan solamen us vezers
		m’ac deceubut tan viatz
	35	qu’ escondudamens
		mi venc al cor us talens
		tals qu’ieu fui enamoratz,
		mas puois m’es tan fort doblatz
		que mati e ser
	40	mi fai doussamen doler.
V		De re no·m sent malmenatz
		vas vos mas quar mos sabers
		mi sofranh a dir plazers ;
		e quar sui desmezuratz
	45	d’amar leyalmens
		cre que·m falh mos essiens ;
		pero, si·n fos dreg jutgatz,
		ia no·n degr’ esser blasmatz,
		qu’aital no-saber
	50	deuriatz en grat tener.
VI		Mas aras chantars no·m platz,
		si m’en valgues esteners !
		pero laissars, non-calers
		m’en fora jois e solatz
	55	hueimais pos n’es mens
		l’emperairitz cui jovens
		a poiad’ e·ls aussors gratz ;
		e si·l cors non fos forssatz
		ben fera parer
	60	c’om fols si sap dechazer.
T1		Ai ! doussa res covinens,
		vensa vos humilitatz,
		pos nuls autre jois no·m platz
		ni d’autre voler
	65	non ai engienh ni saber.
T2		Qe tans sospirs n’ai gitatz
		per que·l jorn e·l ser
		pert sospiran mon poder.