Stronski, Stanislaw. Le troubadour Folquet de Marseille. Genève: Slatkine Reprints, 1968

[CdT en procés d'incorporació]

Code: 155,014 Auteur: Folquet de Marseilla Genre: Canso Numero: VIII

Mout i fetz gran pechat Amors

I	1	Mout i fetz gran pechat Amors,
		quant li plac que·s mezes en me,
		quar Merce no·i aduiss ab se
		ab que s’adousses ma dolors ;
	5	qu’ Amors pert sonom e·l desmen
		et es Dezamors planamen
		pos Merces no·i pot far socors ;
		per que·l fora pretz et honors,
		pos ylh vol venser totas res,
	10	qu’una vetz la venques Merces.
II		S’ar no·us vens, vencutz sui, Amors ;
		venser no·us puesc mas ab Merce ;
		e, s’entre tans mals n’ai un be,
		ja no·us er dans ni desonors ;
	15	cujatz vos doncs que·us estei gen
		quar mi faitz planher tan soven ?
		ans en val meyns vostra lauzors ;
		pero·l mals mi fora doussors,
		sol l’aut ram a qu’era·m sui pres
	20	mi plejes, merceian, Merces.
III		Mas no pot esser, pos Amors
		non o vol, ni midons, so cre ;
		pero, de midons no sai re,
		qu’anc tan no m’enfoli Follors
	25	qu’ieu l’auzes dir mo pessamen,
		mas cor ai que·m cabdel ab Sen
		de l’Ardimen que·m tol Paors ;
		pero Esperars fai las flors
		tornar frug, e de midons pes
	30	qu’esperan la vensa Merces.
IV		Mas trop m’a azirat Amors
		qar ab Merce si dezave ;
		pero·l miels del miels quez hom ve,
		midons, que val mais que valors,
	35	en pot leu far acordamen,
		que major n’a fag per un cen :
		qui ve com la neus e·il calors,
		so es la blanquez’ e·il colors,
		s’acordon en lieis, semblan es
	40	qu’Amors s’i acort e Merces.
V		Estiers no puesc durar, Amors,
		e no sai cossi s’esdeve
		de mon cor — qu’aissi·us a e·us te
		que re non par que n’ai’ alhors —
	45	quar, si be·us etz grans, eissamen
		podetz en me caber leumen
		quo·s devezis una grans tors
		en un pauc miralh, e·il largors
		es i tan grans que, si·us plagues,
	50	enquer neys y caubra Merces.
T1		Mal mi sui gardatz per no-sen,
		qu’a mi eis m’a emblat Amors
		ar qu’er’est ortz de sas dolors ;
		mas dir puesc qu’ieu eis m’i sui pres,
	55	neis no m’en val Dregz ni Merces.
T2		N’Azimans, lo vostre socors
		e d’En Tostemps vuelh ben alhors,
		mas d’aissono vuel sapchatz ges,
		qu’a penas neis o sap Merces.