Stronski, Stanislaw. Le troubadour Folquet de Marseille. Genève: Slatkine Reprints, 1968

[CdT en procés d'incorporació]

Code: 155,001 Auteur: Folquet de Marseilla Genre: Canso Numero: IX

Amors, merce ! : no mueira tan soven !

I	1	Amors, merce ! : no mueira tan soven !
		que ja·m podetz viatz del tot aucire ;
		quar viure·m faitz e morir mesclamen
		et enaissi doblatz mi mo martire ;
	5	pero, meitz mortz, vos sui hom e servire,
		e·l servizis es me miltans plus bos
		que de nulh autr’ aver rics guizardos.
II		Per qu’er peccatz, Amors, so sabetz vos,
		si m’aucietz, pos vas vos no m’azire ;
	10	mas trop servirs ten dan maintas sazos,
		que son amic en pert hom, so aug dire :
		qu’ie·us ai servit, neis ancar no m’en vire,
		e car sabetz qu’en guizardon n’enten,
		ai perdut vos e·l servir eissamen.
III	15	Mas vos, domna, que avetz mandamen
		forsatz Amor e vos cui tan desire,
		non ges per mi mas per dreit chausimen
		e car planhen vo·n pregon mei sospire ;
		que·l cor plora quan vezetz los oils rire,
	20	mas per paor que no·us sembl’ enoios
		engan mi eis e trac mal em-perdos.
IV		Non cujera·l vostr cors orgoillos
		pogues e·l mieu tan lonc desir assire ;
		mas per paor no fezes d’un dan dos
	25	no vos ausi tot mon maltraich devire ;
		ai ! car vostr’ uelh no vezon mo martire ?
		qu’adoncs n’agraz merce, si doncs no men
		lo douz esgartz que·m fai merce parven.
V		A vos volgra mostrar lo mal qu’ieu sen
	30	et als autres celar et escondire ;
		qu’anc no·us puec dir mon cor celadamen ;
		donc, s’ieu no·m sai cobrir, qui m’er cubrire ?
		ni qui m’er fis, s’ieu eis mi sui traire ?
		qui si no sap celar non es razos
	35	que·l celon cil a cui non es nuls pros.
T1		Domna·l fin cor qu’ieu sai no·us puesc tot dire,
		mas so qu’ieu lais qu’ieu no dic per no-sen
		restauratz vos en bon entendemen.
T2		Mas N’Azimans ditz qu’ieu li sui traire,
	40	el e·N Tostemps dizon qu’ieu sui ginhos,
		car tot mon cor non retrac ad els dos.