Stronski, Stanislaw. Le troubadour Folquet de Marseille. Genève: Slatkine Reprints, 1968

[CdT en procés d'incorporació]

Code: 155,021 Auteur: Folquet de Marseilla Genre: Canso Numero: XI

Sitot me soi a tart aperceubutz

I	1	Sitot me soi a tart aperceubutz,
		aissi cum cel qu’a tot perdut e jura
		que mais non joc, a gran bonaventura
		m’o dei tener car me sui conogutz
	5	del gran engan qu’ Amors vas mi fazia,
		c’ab bel semblan m’a tengut en fadia
		mais de detz ans, a lei de mal deutor
		c’ades promet mas re no pagaria.
II		Ab bel semblan que fals’ Amors adutz
	10	s’atrai vas lieis fols amans e s’atura,
		co·l parpaillos qu’a tant folla natura
		que·is fer e l foc per la clardat qe lutz ;
		mas eu m’en part e segrai autra via,
		sos mal pagatz, q’estiers no m’en partria ;
	15	e segrai l’aip de tot bon sofridor
		que s’irais fort si com fort s’umelia.
III		Pero no·is cuig, si be·m sui irascuz
		ni faz de leis en chantan ma rancura,
		ja·l diga ren que no semble mesura ;
	20	mas be sapcha c’a sos ops sui perdutz,
		c’anc sobre fre no·m volc menar un dia,
		anz mi fetz far mon poder tota-via,
		et anc sempre cavals de gran valor,
		qui·l biorda trop soven, cuoill feunia.
IV	25	Fels for’ ieu ben, mas sui m’en retengutz,
		car qui ab plus fort de si·s desmesura
		fai gran foudat ; e neis en aventura
		n’es de son par, qu’esser en pot vencutz ;
		e de plus freul de si es vilania ;
	30	per q’anc no·m plac ni·m platz sobranssaria,
		pero en sen deu hom gardar honor,
		car sen aunit no pretz plus que foillia.
V		Per so, Amors, mi soi ieu recrezutz
		de vos servir, que mais no·n aurai cura ;
	35	q’aissi cum prez’ om plus laida peintura
		de loing, no fai qand l’es de pres venguz,
		prezav’ ieu vos mais qand no·us conoissia,
		e s’anc vos volc, mais n’ai qu’er no volria :
		c’aissi m’es pres cum al fol qeridor
	40	que dis c’aurs fos tot qant el tocaria.
T1		Bels N’Azimans, s’Amors vos destreignia,
		vos ni·N Totztemps, eu·s en conseillaria :
		sol vos membres qant ieu n’ai de dolor
		ni qant de be, la mais no·us en calria.
T2	45	En Plus-Leial, s’ab los huoills vos vezia,
		aissi cum fatz ab lo cor tota-via,
		so q’ieu ai dig porri’ aver valor,
		q’ieu qier conseill e conseill vos daria.