Stronski, Stanislaw. Le troubadour Folquet de Marseille. Genève: Slatkine Reprints, 1968

[CdT en procés d'incorporació]

Code: 155,010 Auteur: Folquet de Marseilla Genre: Canso Numero: XIII

Greu fera nuls hom falhensa

I	1	Greu fera nuls hom falhensa —
		(si tan tempses som bo sen
		quom lo blasme de la gen) —
		qui jutg’, ab desconoissensa,
	5	qu’ieu falh car lais, per temensa
		del blasme desconoissen,
		qu’encontr’ Amor no m’enpren :
		qu’eissamens notz trop sufrensa
		quom leus cor sens retenensa.
II	10	Quar en vostra mantenensa
		me mis, Amors, franchamen,
		e fora·i mortz veramen
		si no fos ma conoissensa ;
		don, non aiatz mais crezensa
	15	qu’ieu m’an, si quom suelh, planhen
		ni moir’ oimais tan soven
		e mas chansos, qu’en parvensa
		n’aurion meins de valensa.
III		E la Merces no vos vensa
	20	per mi, qu’ieu no la·i aten,
		ans m’estarai planamen
		ses vos, pos tan vos agensa,
		francx, de bella captenensa,
		s’ieu puosc, qu’en aisso m’enten ;
	25	e cylh suefran lo turmen
		qui fan, per fol’ atendensa,
		ans del peccat penedensa.
IV		Mas ieu avia plivensa,
		tant quant amiei follamen,
	30	en aisso qu’om vai dizen :
		be fenis qui mal comensa ;
		don ieu avi’ entendensa
		que, per proar mon talen,
		m’acsetz mal comensamen ;
	35	mas ar conosc a prezensa
		que tostems m’agr’ atenensa.
V		E si·m degratz dar guirensa !
		quar miels gazanh’ e plus gen
		qui dona qu’aicel qui pren,
	40	si pretz n’a ni benvolensa ;
		mas voutz es en viltenensa
		vostr’ afars et en nien,
		qu’om vos sol dar, ar vos ven ;
		mas lais m’ on, qu’ieu ai sabensa
	45	de mal dir et estenensa.
T		N’Azimans, al vostre sen,
		e d’En Tostemps eissamen,
		mi teign d’amor, que parvensa
		ne faitz mas pauc vos agensa.