Guarnerio, Pier Enea. Pietro Guglielmo di Luserna, trovatore italiano del sec. XIII. Genova: Tipografia di Angelo Ciminago, 1896

Code: 344,004 Auteur: Peire Guilhem de Luserna Genre: Sirventes Numero: IV

Nom fai chantar amors ni drudaria

I	1	Nom fai chantar amors ni drudaria,
		nim fan chantar flors ni foillas ni bruz
		que fan l'auzel, ni per cho no seria
		plus chantaire tan ni qan, ni plus muz ;
	5	qu'atressi chan, qant l'ivers es venguz,
		cum fas la stat ni la pasca floria :
		qan chan mi plai, ni razos lo m'aduz.
II		Molt m'abellis qui m'a bella paria,
		qant venc en loc o no sui conoguz,
	10	ne qui m'enqer, en dreit de cortezia,
		de qal part sui repairaz ni moguz ;
		car demandan es hom reconoguz
		e responden, per q'es razos q'om sia
		de bels respos als granz e als menuz.
III	15	Et es bels senz qant hom sap gen respondre
		a totas genz, segon que chascus es;
		car lo savis n'aura talan queus n'ondre,
		si de respondreus troba ben apres ;
		e s'al nesci, q'er pecs e malapres,
	20	non respondez, greu er qel nous deshondre
		de paraulas ou de faiz, se locs n'es.
IV		Aitant vos voill de mon plazer despondre,
		qu'a mi plaz mais us sofraitos cortes,
		que del seu pauc sap servir e semondre,
	25	lai on s'eschai, segon qu·el poders es ,
		c'us rics malvaz, a cui soffraing merces ,
		tant q'om no pot del seu raire ni tondre ;
		q'anc de tal ric nom pacgei iorn ni mes.
III		Nim pac d'amor ni de son seignoratge,
	30	car en la fin fai toz sos servidors ;
		clamar de si tant es de mal usage,
		per q'eu non voill sos mals ni sas dolors ;
		e lais me Deus mon meilz trobar aillors,
		em don tal ioi qem torn' en alegrage,
	35	qu'el iois d'amor torna en plainz et en plors.
IV		Si tot nom plaz ni m'abellis amors,
		iois e solaz mi plaz e' mon coratge,
		e plazon mi tuit silh cui plaz honors.