Guarnerio, Pier Enea. Pietro Guglielmo di Luserna, trovatore italiano del sec. XIII. Genova: Tipografia di Angelo Ciminago, 1896

Code: 344,001 Auteur: Peire Guilhem de Luserna Genre: Chanson religieuse Numero: V

Ai vergena, en cui ai m'entendenza

I	1	Ai vergena, en cui ai m'entendenza,
		e s'a vos platz los mieus cars precs auzir,
		iamais de ioi entier nom cal marrir ;
		car vius e mortz aurai ioi ses faillenza
	5	devos, domna, que das ioi per iasse,
		queus ven de sel, c'a en poder e te
		los bes els mals els iois els conseriers ;
		per qu' er en vos servir totz mos mestiers :
		c'autre servirs en dreg vos no m'agenza.
II	10	Valenz domna sobre totas valenza,
		vos pot hom ben lauzar ses contradir ;
		en vos lauzar non pot nuls hom mentir ;
		car flors vos es de vera conoissenza,
		flor[s] de beutat, flor[s] de vera merce,
	15	…………………………..
		flors a cuil mons fon donatz, iois entiers.
		Can venc en vos lo rics reis dreituriers,
		en romazest verg' apres la naissenza.
III		Vos aguest frug, domn', ab menz de semenza,
	20	que totz bos frug fai foillar e florir,
		els fai granar et a lor temps venir,
		frug c'om conquer ab vera penedenza,
		ab deiunar et ab orar ganre,
		ab caritat, que taing c'om ai' en se,
	25	car caritatz es via e sendiers,
		c'adui home a Dieu, qes es frutz pleniers,
		e nos conquier menz de ferma crezenza.
IV		Ben sai, domna, quius a en sovinenza
		e de bon cor si don'a vos servir.
	30	si mezeis serf, car sertz es del iauzir ;
		e ges non l'er tornatz e' nonchalenza
		so servizis, pos en so venra be
		lai on chascus aura paor de se,
		aissi lo iust[s] col laires l'estradiers,
	35	can si fera lo iuiamenz derriers,
		on nuls plaides non trobara guirenza.
V		Bona domna, tant es granz la temenza
		que n'ai, can pes c'aissi m'an faig faillir
		miei fol voler, ab pensar et ab dir,
	40	ab nesis faitz et ab fola parvenza,
		c'a penas posc ni aus clamar merce.
		Vostre car[s] fil[s] pero cant m' en sove
		com' a Longi fon de perdon leugiers,
		ce al lairon fon de preiar frontiers,
	45	non se taing c'ades ma temor non venza.
VI		A reina complida de tot be,
		preiatz, sius platz, vostre car fil de me,
		que m'aleuge mos mals els conseriers ;
		qu'eu trairai lai tan greus e tan sobriers,
		qu'en dreg lo cors, la mortz nom fai temenza.