Frank, István. Pons de la Guardia, troubadour catalan du XIIe siècle. "Boletín de la Real Academia de Buenas Letras de Barcelona", 22 (1949), pp. 229-327.

Code: 063,004 Auteur: Pons de la Garda Genre: Vers Numero: II

Ben es dreitz qu'ieu fassa ueimai

I		Ben es dreitz qu'ieu fassa ueimai
		un vers, depos talan m'en ve ;
		c'ades deu hom far bon essai
		et a mi eschai e cove
	5	que chan mais que faire non sueill ;
		quar l'amor en cui ieu enten
		meillur' et enansa quec jorn.
II		Aman viu et aman morrai :
		c'ab bon cor et ab bona fe
	10	am la meillor dona qu'ieu sai
		e la plus bela c'anc Dieus fe ;
		e dezir la tant e la vueill
		que be·us puesc plevir, e no·n men,
		qu'anc ab leis non aigui larc jorn.
III	15	Ai Dieus, e cora la veirai ?
		C’om non pot aver, qui la ve,
		ira ni consir ni esmai ;
		e sel c'o a no sembla me,
		qu'ieu quan la vei de re no·m dueill.
	20	Pero non l'aus dir mon talen,
		mais enquar aten aquel jorn.
IV		D'aquesta·m don Dieus joi verai,
		c'autre joi no l'ai quist ancse.
		Joi n'aurai ieu s'ela·n mi fai,
	25	bo ja no·n aurai d'autra re,
		c'autre joi lo cor no m'acueill.
		E s'aquest joi me fai jauzen,
		jamais non puesc aver mal jorn.
V		Ai Dieus, qual meravilla ai
	30	quar ja hom d'amar si recre !
		Que neus cel a qui peitz en vai
		— sivals l'en eschai tan de be
		que n'es francx e n'a meins d'ergueill —
		en vol meils far e plus soven
	35	so don pretz guazanha quec jorn.
VI		Be·m vai si a ma dona plai
		que de mi l'aus clamar merce ;
		c'ab aitan soi ricx per jamai,
		e ja no l'en mentrai de re.
	40	E s'ieu ja·m part de leis ni·m tueill,
		ja Dieus no·m lais a mon viven
		de fin'amor jauzir un jorn !
VII		Lauzengiers m'aun fait maint esglai,
		mas un sai, don plus mi sove,
	45	qui per me lauzengers se fai ;
		e ja no·n jauzira, so cre.
		Digua·m n'om un, e tragua·m l'ueill,
		cui anc ne prezes ben ni gen
		de dir lauzenjas sol un jorn !
VIII	50	Ja negus no s'en gart de me
		— neus sel' a qui ieu pens e vueill —
		qu'ieu fas' aital descauzimen
		que ja·m torn lauzenger un jorn.