Squillacioti, Paolo. Le poesie di Folchetto di Marsiglia. Pisa: Pacini, 1999.

Nuova edizione riveduta e aggiornata per il "Corpus des Troubadours", 2009.

Code: 155,023 Auteur: Folquet de Marselha Genre: Canso Numero: IX

Tan mou de cortesa razo

I		Tan mou de cortesa razo
		mos chantars que no·i puosc faillir,
		enans i dei miels avenir
		qu’anc mais non fi; e sabetz co?
	5	quar l’emperaritz m’en somo,
		e plagra·m fort qu’eu m’en giquis
		s’il m’o sofris;
		mas car ill es sim’ e raitz
		d’enseingnamen,
	10	non s’eschai qu’al sieu mandamen
		sia mos sabers flacs ni lenz,
		anz taing que·s doble mos engenz.
II		E s’anc parlei e ma chanso
		de lausengiers, cui Dieus adir,
	15	aras los voill del tot maldir,
		e ja Dieus nonca lor perdo;
		quar an dich so qu’anc vers non fo,
		per que sella cui obedis
		me relinquis
	20	que·s cuja c’aillors aia assis
		mon pensamen;
		ben muer doncs per gran faillimen
		s’ieu pert so que am finamenz,
		per so qu’il dison, qu’es nienz.
III	25	Mas jes per tan no m’abando,
		que anc sempres ai auzit dir
		que mesonja no·s pot cobrir
		que no moira calque sazo;
		e pois dreitz ventz fals’ ochaiso,
	30	ancar er proat e devis
		com ie·l sui fis;
		c’aisi·l sui sobjetz et aclis
		de bon talen,
		qu’en lei amar an pres conten
	35	mos ferms corajes e mos senz,
		q’usquecs cuid’ amar plus fortmenz.
IV		E si Merces no m’i ten pro
		que farai? porrai m’en partir?
		non eu, c’apres ai a morir
	40	de guisa que·m sap sobrebo;
		qu’inz el cor remir sa faisso
		e remiran et eu languis,
		car ella·m dis
		que no·m dara so qu’eu l’ai quis
	45	tan longamen;
		e jes per aisso no m’alen
		anz dobl’ ades mos pessamenz
		e muer aissi mescladamenz.
V		Amarai la doncs a lairo,
	50	puois vei que no·m deigna sofrir;
		que inz en mon cor la desir
		e sai qu’a far m’er, voill’ o no:
		que·l cors ten lo cor en preiso
		et a·l si destreg e conquis
	55	que no m’es vis
		que·l des poder que s’en partis;
		enans aten
		que Merces la·m venca sofren,
		car merces e loncs sofrirs venz
	60	lai on no val forsa ni genz.
VI		E ja·n morai, mas mout m’es gen
		s’ieu muor per leis c’am finamenz,
		pois a morir m’er eissamenz.
[VI']	[61']	[N’Aziman, molt m’estara gen
	[62']	s’ieu mor per midons dousamens,
	[63']	car a morir m’er eisamens.]