Cura Curà, Giulio. Le canzoni del trovatore Uc de Pena. "Critica del Testo", 10, 2 (2007), pp. 9-45.

Code: 456,002a Auteur: Uc de Pena Genre: Canso Numero: III

Uns novels jois m'adutz

I	1	Uns novels jois m’adutz
		Conort don sui jauzenz,
		Qar novels jauzimens
		M’es douzamen vengutz
	5	Per tal q’es flors e frutz
		Sobre totas beutatz;
		E quar s’es esmeratz
		Mos fiz cors vas s’amor,
		Dei anantir lauzan
	10	Sos prez e sa valor,
		Qu’es caps de cortezia.
II		Ab joi sui retengutz
		Qe m’es douz e plazenz,
		E sui traitz de turmenz
	15	On trop era tengutz;
		Pero ges non sui dru[t]z,
		Mas tan sui aut pojatz
		Qe·m sembla gran[s] foudatz:
		Mas qan mi pens l’onor
	20	E·l joi q’ieu n’ai baizan,
		Mos cor[s] en gran [doussor]
		Estai la noig e·l dia.
III		E car non es saubutz
		Mos jois ni mos talenz
	25	Per las malvaizas genz,
		Sui del tot ereubuts,
		Q’els an de tal lor cutz
		On non es mos pessatz,
		E sui de tal privatz
	30	Dont nul lauzenjador
		Non podon tener dan:
		Pero per servidor
		M’aura tant cant vius sia.
IV		Ai, Deus! Com es cregutz
	35	Lo focz q’es tant ardenz!
		Qe la noig en durmenz
		Li sui devan vengutz,
		E·l sieu[s] bel[s] cors es nutz,
		Blancs e dreitz e dolgatz,
	40	Ez eu, agenolliatz
		Devan leis, ades plor
		E clam: «Merces!», ploran
		Qe oblit sa ricor
		E·m prend’e·sa bailia
V	45	Chanzos, ab mil salutz
		Vai al seu cors plazenz,
		Car la estai jovenz
		E pretz es retengutz,
		E di·lh qu’il traj’a lutz
	50	Lo coven qe.m fo datz,
		Car om enamoratz
		Non pot suffrir dolor,
		Q’enanz i vauc doptan
		E n’ai gaug e paor,
	55	Tan tem sa segnoria.