Pasero, Nicolò. Guiglielmo IX. Poesie. Modena: S.T.E.M.-Mucchi, 1973

[CdT en procés d'incorporació]

Code: 183,003 Auteur: Guilhem de Peitieu Genre: Vers Numero: [I]

Companho farai un vers [qu'er] covinen

I	1	Companho, farai un vers [qu'er covinen]
		et aura·i mais de foudatz no·i a de sen,
		et er de totz mesclatz d'amor e de joi e de joven.
II		E tenhatz lo per vilan, qui no l'enten,
	5	qu'ins en son cor voluntiers [res] non l'apren:
		greu partir si fai d'amor qui la trob' a son talen.
III		Dos cavals ai a ma sselha, ben e gen;
		bon son ez ardit per armas e valen;
		ma no·ls puesc tener amdos, que l'uns l'autre non consen.
IV	10	Si·ls pogues adomesgar a mon talen
		ja no volgr' aillors mudar mon garnimen,
		que meils for' encavalguatz de nuill hom e[n mon] viven.
V		Launs fo dels montanhiers lo plus corren,
		mas aitan fer' estranhez' ha longuamen
	15	ez es tan fers e salvatges, que del bailar si defen.
VI		L'autre fo noiritz sa jos, pres Cofolen;
		ez anc no·n vis belazor, mon essien:
		aquest non er ja camjatz, ni per aur ni per argen.
VII		Qu'ie·l donei a son senhor poilli paisen,
	20	pero si·m retinc ieu tan de covinen
		que, s'il lo tenia un an, ieu lo tengues mais de cen.
VIII		Cavalier, datz mi conseill d'un pensamen:
		anc mais no fui eissarratz de cauzimen:
		re no sai ab cal me tenha, de N'Agnes o de N'Arsen.
IX	25	De Gimel ai lo castel e·l mandamen
		e per Niol fauc ergueill a tota gen:
		c'ambedui me son jurat e plevit per sagramen.