Pasero, Nicolò. Guiglielmo IX. Poesie. Modena: S.T.E.M.-Mucchi, 1973

[CdT en procés d'incorporació]

Code: 183,012 Auteur: Guilhem de Peitieu Genre: Vers Numero: [V]

Farai un vers pos mi sonelh

I		Farai un vers, pos mi sonelh,
		e·m vauc e m'estauc al solelh;
		donnas i a de mal conselh,
		et sai dir cals:
	5	cellas c'amor de chevaler
		tornon a mals.
II		Donna non fai pechat mortau
		que ama chevaler leau;
		mas s'ama monge o clergau
	10	non a raizo:
		per dreg la deuria hom cremar
		ab un tezo.
III		En alvernhe, par Lemozi,
		m'en aniei totz sols a tapi:
	15	trobei la moiller d'En Guari
		e d'En Bernart;
		saluderon mi sinplamentz,
		per Saint Launart.
IV		La una·m diz en son lati:
	20	«O, Deus vos salf, don peleri!
		Mout mi senblatz de bel aizi,
		mon escient;
		mas trop vezem anar pel mon
		de folla gent».
V	25	Ar auziretz qu'ai respondut:
		anc no li diz ni «bat» ni «but»,
		ni fer ni fust no ai mentagut,
		mas sol aitan:
		«Babariol, babariol,
	30	babarian».
VI		«Sor», diz N'Agnes a N'Ermessen,
		«trobat avem que anam queren!»
		«Sor, per amor Deu l'alberguem,
		que ben es mutz,
	35	e ja per lui nostre conselh
		non er saubutz».
VII		La una·m pres sotz son mantel
		et mes m'en sa cambra, el fornel:
		sapchatz qu'a mi fo bon e bel,
	40	e·l foc fo bos,
		et eu calfei me volenter
		als gros carbos
VIII		A manjar mi deron capos,
		e sapchatz aig i mais de dos;
	45	et no·i ac cog ni cogastros,
		mas sol nos tres;
		e·l pans fo blancs e·l vins fo bos
		e·l pebr' espes.
IX		«Sor, s'aquest hom es enginhos
	50	e laissa lo parlar per nos,
		nos aportem nostre gat ros
		de mantenent,
		que·l fara parlar az estros,
		si de re·nz ment».
X	55	N'Agnes anet per l'enoios:
		et fo granz, et ac loncz guinhos;
		et eu, can lo vi entre nos,
		aig n'espavent,
		que'a pauc no·n perdei la valor
	60	e l'ardiment.
XI		Quant aguem begut e manjat,
		e·m despoillei per lor grat;
		detras m'aporteron lo chat
		mal e felon:
	65	la una·l tira del costat
		tro al talon.
XII		Per la coa de mantenen
		tir' el chat, el escoisen;
		plajas mi feron mais de cen
	70	aquella ves;
		mas eu no·m mogra ges enguers
		qui m'aucizes.
XIII		«Sor» —diz N'Agnes a N'Ermessen—
		«mutz es, que ben es conoissen».
	75	«Sor, del bainh nos apaireillem
		e del sojorn».
		Ueit jorn ez ancar mais estei
		az aquel torn.
XIV		Tant las fotei com auziretz:
	80	cent et quatre-vinz et ueit vetz,
		que a pauc no·i rompei mos corretz
		e mos arnes;
		e no·us puesc dir los malavegz,
		tan gran m'en pres.
XV	85	E·us no sai dir los malavegz,
		tan gran m'en pres!

 

VERSIONE DEL MANOSCRITTO C

I		En Alvernhe, part Lemozi,
		m'en aniey totz sols a tapi;
		trobey la moler d'En Guari
		e d'En Bernart;
	5	saluderon me francamen
		per sanh Launart.
II		Aujatz ieu que lur respozi:
		anc fer ni fust no y mentagui,
		mas que lur dis aital lati:
	10	«Tarrababart,
		marrababelio riben,
		saramahart».
III		So dis N'Agnes e N'Ermessen:
		«Trobat avem qu'anam queren!
	15	Alberguem lo tot plan e gen,
		que ben es mutz,
		e ia per el nostre secret
		non er sanbutz.
IV		La una·m pres sotz so mantelh
	20	et a mi fon mout bon e belh;
		meneron m'en a lur fornelh,
		e·l foc fo·m bo,
		et ieu calfei me voluntiers
		al gros carbo.
V	25	A manjar me deron capos,
		e·l pan fon cautz, e·l vin fon bos,
		et ieu dirney me volentos,
		fort et espes;
		et anc sol no y ac coguastro,
	30	mas quan nos tres.
VI		«Sor, aquest hom es enginhos
		e laissa son parlar per nos:
		aportatz lo nostre cat ros,
		toit e corren,
	35	que li·n fara dir veritat,
		si de res men».
VII		Quant ieu vi vengut l'enujos,
		—grans ac los pels, fers los guinhos,
		ges son solas no mi fon bos!—
	40	totz m'espaven;
		ab pauc no perdiey mas amors
		e l'ardimen.
VIII		Quam aguem begut e manjat,
		despulley·m a lur voluntat;
	45	derreire m'aportero·l cat,
		mal e fello;
		et escorgerou me del cap
		tro al talo.
IX		Per la coa·l pres N'Ermessen,
	50	e tira, e·l cat escoyssen;
		plaguas me feyron mays de cen
		aquella ves;
		coc me, mas ieu per tot aquo
		no·m mogui ges.
X	55	Ni o feyra qui m'aucizes,
		entro que pro fotut agues
		ambedos; qu'ayssi fon empres
		a mon talen,
		ans vuelc mais sufrir la dolor
	60	e·l greu turmen.
XI		Aitan fotey cum auzirets:
		.C. e quatre .XXVIII. vetz;
		ab pauc no·m rompei mos corretz
		e mos arnes;
	65	e venc m'en trop gran malaveg,
		tan mal me fes.
XII		Monet, tu m'iras al mati,
		mo vers portaras el borssi
		dreg a la molher d'En Guari
	70	e d'En Bernat:
		e diguas lor que per m'amor
		aucizo·l cat!