Pasero, Nicolò. Guiglielmo IX. Poesie. Modena: S.T.E.M.-Mucchi, 1973

[CdT en procés d'incorporació]

Code: 183,007 Auteur: Guilhem de Peitieu Genre: Vers Numero: [IV]

 Farai un vers de dreit nien

I		Farai un vers de dreit nien:
		non er de mi ni d’autra gen,
		non er d’amor ni de joven,
		ni de ren au,
	5	qu’enans fo trobatz en durmen
		sus un chivau.
II		No sai en qual hora·m fui natz,
		no soi alegres ni iratz,
		no soi estranhs ni soi privatz,
	10	ni no·n puesc au,
		qu’enaisi fui de nueitz fadatz
		sobr’un pueg au.
III		No sai cora'm fui endormitz,
		ni cora·m veill, s’om no m’o ditz;
	15	per pauc no m’es lo cor partitz
		d’un dol corau;
		e no m’o pretz una fromitz,
		per saint Marsau!
IV		Malautz soi e cre mi morir;
	20	e re no sai mas quan n’aug dir.
		Metge querrai al mieu albir,
		e no·m sai tau;
		bos metges er, si·m pot guerir,
		mor non, si amau.
V	25	Amigu’ ai ieu, non sai qui s’es:
		c’anc no la vi, si m’aiut fes;
		ni·m fes que·m plassa ni que·m pes,
		ni no m’en cau:
		c’anc non ac Norman ni Franses
	30	dins mon ostau.
VI		Anc non la vi et am la fort:
		anc no n’aic dreit ni no·m fes tort;
		quan no la vei, be m’en deport;
		no·m prez un ja:
	35	qu’ie·n sai gensor e belazor.
		e que mais vau.
VII		No sai lo luec ves on s’esta,
		si es en pueg ho [es] en pla;
		non aus dire lo tort que m’a,
	40	abans m’en cau;
		e peza·m be quar sai rema,
		[per] aitan vau.
VIII		Fait ai lo vers, no sai de cui;
		et trametrai lo a celui
	45	que lo·m trametra per autrui
		enves Peitau,
		que·m tramezes del sieu estui
		la contraclau.