Oroz Arizcuren, Francisco J. La lírica religiosa en la literatura provenzal antigua. Pamplona: Excma. Diputación Foral de Navarra - Institución Príncipe de Viana, 1972.

Edición crítica, traducción, notas y glosario. Versión revisada para Corpus des Troubadours, 2011.

Code: 282,002 Auteur: Lanfranc Cigala Genre: Chanson religieuse Numero: XXXVII

En chantar d'aquest segle fals

I	1	En chantar d’aquest segle fals
		ay tant’obra perduda,
	3	don tem aver penas mortals,
		si merces no m’aiuda;
		per que mos chans se muda:
	6	eu·l vuelh ofrir
		lai don venir
		me pot complid’aiuda,
	9	sol no·m sia irascuda
		la Maire Dieu
		cuy mos chantars saluda.
II	12	Pero si garda mos peccatz,
		be·m deu esser irada;
		mas sa gran merce prec, si·l platz,
	15	la mi fassa paguada.
		Aitals merces m’agrada,
		quar es secors
	18	dels pecadors
		cuy es razos lonhada.
		Sia·m merces donada
	21	Maire de Dieu,
		quar per merce fos nada.
III		Qu’anz que·l vostre belhs cors ioyos
	24	nasques era establida
		morz a quascun qu’el segle fos;
		quar l’avia merida
	27	Eva, tan fon ardida,
		quar tenc a lieu
		lo dig de Dieu,
	30	de que fon pois aunida;
		mas pois en vostra guida,
		Maire de Dieu,
	33	em trag de mort a vida.
IV		Per Eva e per son peccat
		era tota gens morta;
	36	mas per vostra virginitat
		n’es uberta la porta.
		Eva per via torta
	39	nos aduys mort,
		e vos conort,
		don la gens es estorta.
	42	Tal frug vostr’albres porta,
		Maire de Dieu,
		que vida nos aporta.
V	45	Ev’autreyet, quar li fon bel,
		al dïable bauzia,
		e vos a l’angel Gabrïel
	48	la vera prophecia.
		Eva ac nom l’enemia;
		el contradig
	51	segon l’escrig
		ditz hom: ‘Ave’ Maria.
		Tot so qu’Eva desvia,
	54	Maire de Dieu,
		‘ave’ torna en la via.
VI		Per qu’ieu vos lau e·us dei lauzar,
	57	glorïosa reyna,
		quar quascus nafratz pot trobar
		en vos vera mezina;
	60	quar vostra merces fina
		quascun que·s vol
		guaris de dol,
	63	de mal e de ruyna,
		si de cor vos aclina,
		Maire de Dieu
	66	qu’als bos precs etz vezina.
VII		Ara vos prec e·us clam merce,
		que no·m siatz lunhdana;
	69	qu’ieu sent nafrat mon cor e me
		e ma voluntat vana
		de foli’e d’ufana;
	72	per qu’ieu vos quier
		cosselh entier
		et aiuda certana.
	75	Sia·m merces propdana,
		Maire de Dieu,
		don m’arma sia sana.
VIII	78	Quar, si tot ay d’obra falhit,
		crezens’ay drech’asiza:
		Pair’e Filh e Sanch Esperit
	81	cre un Dieu ses deviza;
		e·l carn qu’en crotz fon miza
		pres Dieus de vos
	84	per salvar nos,
		e per so fon auciza;
		e qui cre d’autra guiza,
	87	Maire de Dieu,
		sai ben que·l colh se briza.
IX		Don cre per ferm qu’enans lo part
	90	et apres ses fallensa
		vergena fust, qu’anc no·y ac part
		d’ome carnals semensa;
	93	e·l ver salm que comensa
		‘credo’ cre tot
		de mot en mot.
	96	Donc d’als me faitz valensa,
		que de falsa crezensa,
		Maire de Dieu,
	99	no m’a ops penedensa.
X		Pero, domna, quar miels sabez
		so que·m fai sofraichura,
	102	de so qu’obs m’es mi secorrez
		tant quant vida mi dura,
		qu’eu faz’obra tan pura
	105	que paradis
		aia conquis
		cant er la noiz escura.
	108	Be sai que·m noz drechura,
		Maire de Dieu,
		mais merces m’asegura.