Squillacioti, Paolo. Le poesie di Folchetto di Marsiglia. Pisa: Pacini, 1999.

Nuova edizione riveduta e aggiornata per il "Corpus des Troubadours", 2009.

Code: 155,010 Auteur: Folquet de Marselha Genre: Canso Numero: XII

Greu feira nuills hom faillenssa

I		Greu feira nuills hom faillenssa,
		si tant temses son bon sen
		cum lo blasme de la gen,
		qui jutg’ ab desconoissenssa;
	5	qu’ieu faill car lais, per temenssa
		del blasme desconoissen,
		qu’encontr’Amor no m’enpren:
		qu’eissamen notz trop sofrenssa
		cum leus cors ses retenenssa.
II	10	Car en vostra mantenenssa
		me mis, Amors, franchamen,
		e fora·i mortz veramen
		si no fos ma conoissenssa;
		don, non aiatz mais crezenssa
	15	qu’eu m’an, si cum suoill, plaignen
		ni moira oimais tant soven
		en mas chansos, qu’en parvenssa
		n’avian meins de valenssa.
III		E ja Merces no vos venssa
	20	per mi, qu’ieu no la·i aten,
		anz m’estarai planamen
		ses vos, pois tant vos agenssa,
		francs, de bella captenenssa,
		s’ieu puosc, qu’en aisso m’enten;
	25	e cill sofran lo tormen
		que fan, per folla atendenssa,
		anz del pechat penedenssa.
IV		Mas eu avia plivenssa,
		tant quant amei follamen,
	30	en aisso c’om vai dizen:
		ben fenis qui mal comenssa;
		don eu avia entendenssa
		que, per proar mon talen,
		m’acsetz mal comenssamen;
	35	mas er conosc a presenssa
		que totz temps m’agra tenenssa.
V		E si·m degratz dar guirenssa!
		car mieills gazaigna e plus gen
		qui dona qu’aicel qui pren,
	40	si pretz n’a ni benvolenssa;
		mas voutz es en viltenenssa
		vostr’ afars et en nien,
		c’om vos sol dar, er vos ven;
		mas lais m’en, qu’ieu ai sabenssa
	45	de mal dir et estenenssa.
VI		N’Aziman, al vostre sen,
		e d’En Totztemps eissamen,
		mi teing d’Amor, que parvenssa
		ne fatz mas pauc vos agenssa.
		Versione β
I		Greu feira nuils hom faillensa
		si tan temses son bon sen
		com lo blasme de la gen
		que jutgon desconoisensa
	5	qu’ieu faill quar lais, per temensa
		d’un blasme desconoisen,
		qu’encotr’Amor no m’enpren:
		qu’eisamen notz trop sufrensa
		com leus cor ses retenensa.
II	10	Car en la vostra mantenensa
		me mis, Amors, franchamen,
		e fora mortz veramen
		si no fos ma conoisensa;
		don, non aiatz mais plivensa
	15	qu’eu m’an, si com sueill, planhen
		ni·n mueir’ ueimais tan soven:
		que mas chansos a parvensa
		n’aurion meins da valensa.
III		E ja Merces no vos vensa
	20	per me, qu’eu no la·i aten,
		ans estarai planamen
		ses vos, pos tant vos agensa,
		franx, de bela captenensa,
		si pos, qu’en aiso m’enpren;
	25	quar sill suefron lo turmen
		que fan, per fol’ entendensa,
		ans del pecat penedensa.
IV		Car ieu avia crezensa,
		tan quant amei folamen,
	30	en aiso c’om vai dizen:
		ben fenis qui mal comensa;
		per qu’ieu avia entendensa
		que, per proar mon talen,
		m’acses mal comensamen;
	35	mas aras vei a prezensa
		que tostems m’agra tenensa.
V		E si·m degratz dar guirensa!
		quar meils guazanh e plus gen
		qui dona c’aisel que pren,
	40	si pretz n’a ni benvolensa;
		mas voutz es en viltenensa
		vostr’ afars et en nien,
		c’om vos sol dar, ar vos ven;
		mas lais m’en, qu’eu ai sabensa
	45	de mal dir et abstenensa.
VI		N’Aziman, al vostre sen,
		e d’En Tostems eisamen,
		estau d’Amor, car parvensa
		en fais mas pauc vos agensa.