Squillacioti, Paolo. BdT 276,1 Longa sazon ai estat vas Amor. "Rivista di Studi testuali", 2 (2000), pp. 185-215.

Code: 276,001 Auteur: Jordan de l'Isla de Venessi Genre: Canso Numero: -

Longa sazon ai estat vas Amor

I		Longa sazon ai estat vas Amor
		humils e francs, et ay fach son coman
		en tot quant puec; quez anc per nulh afan
		qu’ieu en sufris ni per nulla dolor,
	5	de leis amar non parti mon corage
		a cui m’era rendutz de bon talen,
		entro conuc en leis un fol usage
		de que·m dechai e m’a camjat mon sen.
II		Agut m’agra per lial servidor,
	10	mas tan la vei adonar ab enjan,
		per que s’amors no mi plaz derenan,
		ni·m pot far ben que ja m’agues sabor;
		partirai m’en, qu’aissi ven d’agradage,
		pos ella·s part de bon prez eissamen,
	15	et er m’ailhors segre autre viage
		on restaure so que m’a fach perden.
III		Ben sai, si·m part de leis ni·m vir ailhor,
		que no·ilh er grieu ni non s’o ten a dan;
		mas si cuch ieu valer e saber tan
	20	qu’aissi com sueilh enantir sa valor
		li sabria percassar son dampnage;
		pero lais m’en en drech mon chauzimen,
		quar asaz fai qui de mal seinhorage
		si sap partir ni loinhar bonamen.
IV	25	En paz m’en part; mas quan cossir l’error
		ni·l dan qu’ai pres ni·l destric leis aman,
		ni co m’agra trobat ses cor truan
		qui·m fera ben e·m tengra en doussor,
		non puesc mudar que no·m sia salvage;
	30	aissi·m conort, qu’auzit ai dir soven
		qu’ades pass’om primiers per lo follage
		e pueis tainh be qu’om s’an reconoissen.
V		Ay! com cugiei fos dinz d’aital color
		com aparec de foras per semblan!
	35	et enaissi com ilh a beutat gran
		e com val mais, gardes gençer s’onor;
		et enaissi com es de bell estage
		degra aver en se retenemen;
		et enaissi com es d’auçor parage
	40	contra son prez temses far failhimen.
VI		Ja non degra beutatz far son estage
		ni remaner en donna d’autramen,
		si non gardes s’onor e son parage
		e non agues en se retenemen.