Squillacioti, Paolo. Le poesie di Folchetto di Marsiglia. Pisa: Pacini, 1999.

Nuova edizione riveduta e aggiornata per il "Corpus des Troubadours", 2009.

Code: 155,009 Auteur: Folquet de Marselha Genre: Canso Numero: XV

Fin’ amors a cui me soi datz

I		Fin’ amors a cui me soi datz
		e·l gens terminis amoros,
		cascuns d’aquetz m’es ochaizos
		don dei esser enamoratz;
	5	per qu’es dreitz c’ab lo lur aon
		fassa conoiser en chantan
		com ieu soi faitz ab lur coman.
II		Quar meils sai sufertar em patz
		si que mos volers no·s descos;
	10	e par be ja per als non fos
		mas quar am e non soi amatz;
		e ja sill don chan no m’aon
		s’a totz jorns no·m vau meilluran
		de leis ben amar ses enguan.
III	15	Per que·us prec que merce n’aiatz
		ses tort qu’ieu anc non aic vas vos;
		e si·l dreiz, qu’es tan cabalos,
		no·m pot valer, humelitatz
		mi vaill’ ab vos, don’, e m’aon,
	20	quar nuills dreitz non a valor gran
		lai on forsa fai son talan.
IV		C’aisi m’es el cor sagelatz
		vostre rics pretz verais e bos
		per qu’ieu non soi ges poderos
	25	que·m biaise vas autre latz,
		ni no vueill ja c’autra m’aon
		mas vos, dona, per cui ieu chan
		et am e dezir e reblan.